विद्युत उपकेंद्रच्या इमारतीची दुरावस्था

विद्युत उपकेंद्रच्या इमारतीची दुरावस्था
नेरूळ, ता. २ (बातमीदार) ः कोपरखैराणे येथील महावितरणच्या विद्युत उपकेंद्राच्या इमारतीची अवस्था अत्यंत दयनिय झाली असून दुर्घटनेचा धोका संभवतो. या इमारतीची तात्काळ दुरुस्ती करण्याची मागणी सामाजिक कार्यकर्ते सुनिकेत हांडेपाटील यांनी केली आहे. यासंदर्भात महावितरणच्या सहाय्यक अभियंत्यांकडे लेखी निवेदन सादर केले आहे.
कोपरखैराणे सेक्टर १६, १७, २२ व २३ येथील महावितरणच्या विद्युत उपकेंद्राची इमारत खराब व जीर्ण झाली आहे. इमारतीच्या भिंतींना तडे गेले असून काही ठिकाणी सिमेंट व प्लास्टर निघालेले आहे. तसेच संरचनेची स्थिती वाटत असून पावसाळ्यात दुर्घटना होण्याची शक्यता नाकारता येत नसल्याचे सुनिकेत हांडेपाटील यांनी म्हंटले आहे.
या उपकेंद्रातून परिसरातील नागरिकांना नियमित वीजपुरवठा केला जातो. त्यामुळे या इमारतीची सुरक्षितता व मजबूती महत्त्वाची आहे. कोणताही अनुचित प्रसंग टाळण्यासाठी तसेच कर्मचारी व नागरिकांच्या सुरक्षेच्या दृष्टीने उपकेंद्राची तात्काळ तपासणी करून आवश्यक ती दुरुस्ती करण्याची मागणी सुनिकेत हांडेपाटील यांनी केली आहे.