हनुमान जयंतीला १२ हजार भक्तांची उपस्थिती

हनुमान जयंतीला १२ हजार भक्तांची उपस्थिती

बोईसर, ता. २ (वार्ताहर) : श्री हनुमान जन्मोत्सवानिमित्त बोईसरमध्ये विश्व हिंदू परिषद व बजरंग दल यांच्या वतीने भव्य शोभायात्रा उत्साहात पार पडली. या शोभायात्रेत १२ हजारांहून अधिक भक्त सहभागी झाले होते.
संपूर्ण शहर भगव्या रंगात न्हाऊन निघाले असून, ‘जय श्रीराम’ व ‘जय हनुमान’च्या घोषणांनी वातावरण दुमदुमले. भक्तिगीतांच्या गजरात निघालेल्या मिरवणुकीचे नागरिकांनी ठिकठिकाणी फुलवृष्टी करून स्वागत केले. व्यापारी व नागरिकांनी पाणी व अल्पोपहाराची व्यवस्था केली होती. या वेळी भगवान श्रीराम, हनुमान तसेच महापुरुषांच्या आकर्षक झांक्यांद्वारे धार्मिक संदेश देण्यात आला. दरम्यान, आयोजकांनी २५१ कुटुंबांतील ६०० हून अधिक व्यक्तींची ‘घरवापसी’ झाल्याचा दावा केला. स्थानिक नागरिक, युवक व महिलांच्या मोठ्या सहभागामुळे हा उपक्रम सामाजिक ऐक्य वृद्धिंगत करणारा ठरल्याचे आयोजकांनी सांगितले.