वर्तकनगरमधील मिठाई दुकानाला आग

ठाणे, ता. ३ : वर्तकनगर येथील अशर मेट्रो टॉवरमधील हरिओम स्वीट्स या दुकानात शुक्रवारी (ता. ३) सकाळी ९.१८च्या सुमारास इन्व्हर्टरच्या बॅटरीला आग लागल्याची घटना समोर आली. आगीत इन्व्हर्टर बॅटरी, इलेक्ट्रिक वाहिन्या, कागदी पुठ्ठे व लाकडी कपाट जळून नुकसान झाले. ही इमारत तळ अधिक ३० मजली असून, तळमजल्यावर हितेश चौधरी यांच्या मालकीचे दुकान आहे. घटनेची माहिती मिळताच ठाणे महापालिका अग्निशमन दल, आपत्ती व्यवस्थापन कक्ष, महावितरण व वर्तकनगर पोलिसांनी तत्काळ आगीवर नियंत्रण मिळविले. घटनेत कोणतीही जीवितहानी झालेली नाही, अशी माहिती पालिका आपत्ती व्यवस्थापन अधिकारी यासिन तडवी यांनी दिली.