बारामती पोटनिवडणुक बिनविरोध व्हावी - आशिष शेलार

बारामती पोटनिवडणूक बिनविरोध व्हावी
- आशीष शेलार
सकाळ वृत्तसेवा
ठाणे, ता. ६ : बारामती विधानसभा मतदारसंघातील पोटनिवडणूक बिनविरोध होण्यासाठी सर्व राजकीय पक्षांनी पुढाकार घ्यावा, असे आवाहन राज्याचे मंत्री आशीष शेलार यांनी केले. एखाद्या वरिष्ठ नेत्याच्या निधनानंतर राज्यात पोटनिवडणूक सर्वानुमते पार पाडण्याची परंपरा असून, ती अबाधित ठेवण्याची गरज असल्याचेही त्यांनी स्पष्ट केले.
भाजपच्या पक्ष स्थापना दिनानिमित्त ठाण्यात आयोजित कार्यक्रमात ते बोलत होते. बारामती पोटनिवडणुकीच्या पार्श्वभूमीवर काँग्रेसकडून उमेदवारी दिली जाणार का, या प्रश्नावर शेलार यांनी थेट प्रतिक्रिया देणे टाळले. मात्र राज्यातील परंपरेनुसार अशा निवडणुका सर्वांच्या सहमतीने बिनविरोध पार पाडल्या जातात. सर्व पक्षांनी या संकेताचा आदर राखत निर्णय घ्यावा, असे त्यांनी नमूद केले. दरम्यान, अशोक खरात प्रकरणातील फोन कॉलच्या सीडीआर प्रकरणी उबाठाच्या नेत्यांनी केलेल्या आरोपाबाबत विचारले असता, या विषयावर मुख्यमंत्री देवेंद्र फडणवीस यांनी आधीच आपली भूमिका स्पष्ट केली आहे. त्यामुळे यापुढे अनावश्यक चर्चा टाळावी, असेही शेलार यांनी सांगितले.