सत्पाळा-राजोडी उघाडीच्या बांधकामाची महापौर-उपमहापौरांकडून तातडीने पाहणी

सत्पाळा-राजोडी उघाडीच्या बांधकामाची महापौर-उपमहापौरांकडून तातडीने पाहणी

विरार, ता. १३ (बातमीदार) : सत्पाळा-राजोडी बंधारा येथे खारभूमी विभागामार्फत सुरू असलेल्या उघाडीच्या बांधकामाबाबत स्थानिक नागरिकांनी तक्रारीचा पाढा वाचल्यानंतर, सोमवारी (ता. १३) महापौर अजीव पाटील आणि उपमहापौर मार्शल लोपीस यांनी प्रत्यक्ष घटनास्थळी जाऊन कामाची पाहणी केली. या उघाडीचे बांधकाम करताना तळाची योग्य लेव्हल राखली गेली नसल्याचे लोकप्रतिनिधींच्या पाहणीत स्पष्ट झाले असून, यामुळे परिसरातील पाणी निचरा होण्याच्या प्रक्रियेवर गंभीर परिणाम होण्याची शक्यता निर्माण झाली आहे.

या नाल्यातून वटार, नवापूर आणि सत्पाळा हद्दीतील पावसाळी पाण्याचा मोठा निचरा होत असतो. मात्र, सध्याच्या सदोष बांधकामामुळे पावसाळ्यात या भागातील नागरिकांना जलमय परिस्थितीचा सामना करावा लागण्याची भीती व्यक्त होत आहे. या समस्येचे गांभीर्य लक्षात घेऊन महापौर आणि उपमहापौरांनी संबंधित विभागाला तातडीने नाल्याची खोदाई करून त्याचे रुंदीकरण करण्याच्या सूचना दिल्या आहेत. वेळेत योग्य लेव्हल आणि रुंदीकरण करण्यात आले नाही, तर भविष्यात मोठी समस्या उद्भवू शकते, असा इशाराही या वेळी प्रशासनाला देण्यात आला. या पाहणीमुळे खारभूमी विभागाच्या कारभारावर प्रश्नचिन्ह निर्माण झाले असून, नागरिकांच्या हितासाठी तातडीने सुधारणा करण्याची मागणी जोर धरत आहे. या प्रसंगी नगरसेवक डॉमनिक रुमाव व बहुजन विकास आघाडीचे प्रमुख पदाधिकारी-कार्यकर्ते हेदेखील उपस्थित होते.