रेल्वे प्रवासादरम्यान बॅग चोरी

सकाळ वृत्तसेवा
ठाणे, ता. १४ : अमरावती-मुंबई एक्स्प्रेसमध्ये प्रवास करणाऱ्या पालघर येथील दिनेशकुमार बाफना या प्रवाशाची ट्रॉली बॅग चोरट्याने लंपास केल्याची घटना शनिवारी (ता. ११) घडली आहे. संबंधित प्रवासी कुटुंबासह शिरपूर येथून देवदर्शन करून परत येत होता. भुसावळ स्थानकानंतर झोपेत असताना त्याने बॅग सीटखाली ठेवली होती. मात्र, ठाणे स्थानकावर सकाळी उतरतानाच बॅग गायब झाल्याचे लक्षात आले. चोरीस गेलेल्या बॅगेत कपडे व इतर साहित्य असा सुमारे सात हजारांचा ऐवज होता. याप्रकरणी दादर रेल्वे पोलिस ठाण्यात तक्रार दाखल करण्यात आली. तो गुन्हा ठाणे लोहमार्ग पोलिस ठाण्यात वर्ग करण्यात आला असून पुढील तपास सुरू आहे.