पेणमध्ये निळे झेंडे फडकवत जल्लोष
डॉ. आंबेडकर जयंतीत उत्साहात
पेण, ता. १४ (वार्ताहर) : महामानव डॉ. बाबासाहेब आंबेडकर यांच्या १३५व्या जयंतीनिमित्त पेण तालुक्यात उत्साहपूर्ण वातावरणात विविध कार्यक्रमांचे आयोजन करण्यात आले. शहरातील आंबेडकर चौकातील पुतळ्यास सकाळपासून नगरपालिका, पोलिस प्रशासन, भीमसैनिक तसेच विविध सामाजिक व राजकीय कार्यकर्त्यांकडून पुष्पहार अर्पण करून अभिवादन करण्यात आले.
संध्याकाळी पेण शहर जयंती उत्सव समितीच्या वतीने मिरवणूक काढण्यात आली. या मिरवणुकीत तरुण-तरुणींनी माता रमाई आणि बाबासाहेबांच्या गीतांवर नृत्य सादर करीत उत्सवात रंगत आणली. सहभागी नागरिकांनी हातात निळे झेंडे घेऊन ‘जय भीम’च्या घोषणांनी परिसर दुमदुमून सोडला. डीजेच्या तालावर नाचत आणि फटाक्यांच्या आतषबाजीने संपूर्ण शहर निळे झाले होते.
या कार्यक्रमाला माजी खासदार धैर्यशील पाटील, मुख्याधिकारी जीवन पाटील, नगराध्यक्षा प्रीतम पाटील, गटनेते अनिरुद्ध पाटील, जयंती उत्सव समितीचे अध्यक्ष आनंद जाधव यांच्यासह विविध राजकीय, सामाजिक संघटनांचे पदाधिकारी आणि हजारो भीमसैनिक मोठ्या संख्येने उपस्थित होते.