तळवली येथे गोरोबाकाका पुण्यतिथी सोहळा

तळवली येथे गोरोबाकाका पुण्यतिथी सोहळा
रोहा, ता. १९ (बातमीदार) ः रोहा तालुक्यातील श्रीक्षेत्र तळवली येथे संत शिरोमणी गोरोबाकाका यांची पुण्यतिथी बुधवारी (ता. १५) भक्तिभावाने साजरी करण्यात आली.
स्वर्गीय सद्गुरूवर्य अलिबागकर महाराज, धोंडूबाबा कोलाटकर व गोपाळ बाबा यांच्या कृपाशीर्वादाने तसेच हभप गुरूवर्य दत्तू महाराज कोलाटकर (मठाधिपती, पंढरपूर) यांच्या मार्गदर्शनाखाली हा सोहळा पार पडला.
या वेळी देवतांचे अभिषेक व पूजाविधी, कलशस्थापना, ध्वजारोहण, वीणा पहारा व भजन, हभप मदन महाराज कोलाटकर यांची पुष्पवृष्टीपर कीर्तन सेवा, दुपारी महाप्रसाद, सायंकाळी हभप तुकाराम महाराज महाडिक यांचे प्रवचन, सामुदायिक हरिपाठ, त्यानंतर हभप भूषण महाराज वरखले यांची कीर्तन सेवा व जागर भजन असे विविध धार्मिक व आध्यात्मिक कार्यक्रम पार पडला.