भरधाव स्कूटीच्या धडकेत पादचाऱ्याचा मृत्यू

नवी मुंबई (वार्ताहर) : सीवूड्स परिसरात एका भरधाव स्कूटीने दिलेल्या धडकेत ४७ वर्षीय पादचाऱ्याचा मृत्यू झाल्याची घटना घडली आहे. याप्रकरणी एनआरआय सागरी पोलिसांनी स्कूटीचालकाविरोधात गुन्हा दाखल केला आहे. पुंडलिक विठ्ठल सोनावणे हे सीवूड्स सेक्टर-३६ करावे गाव येथील शिवशंकर अपार्टमेंटमध्ये राहत होते. रविवारी (ता. १९) सायंकाळी ते करावे भागातील गणेश मैदानाजवळून पायी जात होते. या वेळी त्यांच्या मागून आलेल्या एका स्कूटीचालकाने त्यांना जोराची धडक दिली. त्यानंतर स्कूटीचालकाने जखमी सोनावणे यांना रुग्णालयात नेण्याऐवजी किंवा अपघाताची माहिती पोलिस ठाण्यात देण्याऐवजी तिथून पळ काढला. गंभीर दुखापत झालेल्या सोनावणे यांचा उपचारादरम्यान बुधवारी (ता. २२) मृत्यू झाला. पोलिस सध्या परिसरातील सीसीटीव्ही फुटेजच्या आधारे फरार स्कूटीचालकाचा शोध घेत आहेत.