भक्ष्याच्या शोधात आलेला अजगर कोंबड्याच्या पिंजऱ्यात

कोंबड्यांच्या पिंजऱ्यात अडकलेल्या अजगराची सुटका
खालापूर, ता. २७ (बातमीदार) ः भक्ष्याच्या शोधात कोंबड्यांच्या पिंजऱ्यात शिरलेला सुमारे सहा फूट लांबीचा अजगर अडकून बसल्याची घटना खोपोली हद्दीतील हाळ बुद्रुक गावात घडली. सर्पमित्रांच्या तत्परतेमुळे अजगराची सुरक्षित सुटका करण्यात आली. अमजद सोंडे यांना गुरुवारी (ता. २३) कोंबड्यांचा विचित्र ओरडण्याचा आवाज आला. त्यांनी कोंबड्याच्या पिंजऱ्याकडे जाऊन पाहिले असता अजगर पिंजऱ्यात अडकून बसल्याचे निदर्शनास आले. सोंडे यांनी तत्काळ हेल्प फाउंडेशनचे गुरुनाथ साठेलकर आणि अमोल ठकेकर यांना याबाबत माहिती दिली. सर्पमित्रांनी अजगराला सुखरुप बाहेर काढत नैसर्गिक अधिवासात सोडून दिले.