मुंब्र्यात गांजा सेवन करणाऱ्या दोघांना अटक

मुंब्रा, ता. २८ (बातमीदार) : येथील पोलिसांनी अमली पदार्थविरोधी मोहिमेत गांजा सेवन करणाऱ्या दोन तरुणांना अटक केली आहे. शमशेर मुस्तफा शेख (वय ३८) आणि शादाफ फारूक वस्ता (वय २७) अशी तरुणांची नावे आहेत. मुंब्रा बायपास रोडवरील एस. के. रेसिडेन्सीजवळील मोकळ्या मैदानात काही व्यक्ती गांजाचे सेवन करत असल्याची माहिती मुंब्रा पोलिस ठाण्याच्या पथकाला गस्तीदरम्यान मिळाली होती. त्यानुसार दोन वेगवेगळ्या ठिकाणी सापळा रचून त्यांना रंगेहाथ पकडले. कारवाईदरम्यान त्यांच्याकडील अमली पदार्थांचे साहित्य जप्त करून नष्ट करण्यात आले. त्यानंतर दोघांनाही छत्रपती शिवाजी महाराज रुग्णालय, कळवा येथे वैद्यकीय तपासणीसाठी नेले. तपासणीत त्यांनी गांजाचे सेवन केल्याचे स्पष्ट झाले. याप्रकरणी दोघांविरुद्ध एन.डी.पी.एस. कायद्याअंतर्गत गुन्हा दाखल केला असून पुढील तपास सुरू आहे.