जनगणना प्रशिक्षणाचे दुसरे सत्र

जनगणना प्रशिक्षणाचे धडे
पालिकेकडून नियुक्त कर्मचाऱ्यांना मार्गदर्शन

विरार, ता. ६ (बातमीदार) ः वसई-विरार शहर महापालिकेत जनगणना २०२७ अंतर्गत स्वगणना प्रक्रियेस सुरुवात झाली आहे. तर १६ मे पासून घरगणनेला होणार असल्याने क्षेत्रीय प्रशिक्षकांमार्फत प्रगणक, पर्यवेक्षकांना पालिकेकडून तीन सत्रांमध्ये प्रशिक्षण दिले जाणार आहे.
वसई-विरार शहर पालिकेतील नऊ प्रभाग समित्यांअंतर्गत शाळा/महाविद्यालयांमध्ये प्रशिक्षण दिले जाणार आहे. या कामासाठी वसई-विरार शहर पालिका क्षेत्रात एक मास्टर ट्रेनर, ९१ क्षेत्रीय प्रशिक्षक, ७१७ पर्यवेक्षक तसेच ४,२९८ प्रगणकांची नियुक्ती करण्यात आली आहे. देशातील पहिलीच डिजिटल जनगणना असल्यामुळे संबंधित पर्यवेक्षक व प्रगणकांना योग्य व अचूक प्रशिक्षण देण्यात येत आहे. प्रशिक्षणादरम्यान विशेष मोबाईल ॲपचा वापर, प्रश्नावलीचे सुलभीकरण तसेच डेटाची सुरक्षा तांत्रिक बाबींसोबतच नियुक्त पर्यवेक्षकांना ॲपच्या माध्यमातून कामकाजाचे प्रात्यक्षिक दाखवण्यात आले.
-------------------------
गैरहजर कर्मचारी रडारवर
जनगणना प्रशिक्षणास गैरहजर राहिलेल्या कर्मचाऱ्यांना विभागामार्फत नोटिसा देण्यात आल्या असून, त्यांच्यावर विभागामार्फत कारवाई प्रस्तावित करण्यात येत आहे. जनगणना २०२७ अंतर्गत १ ते १५ मे या कालावधीत नागरिकांना स्वगणना ही सुविधा उपलब्ध करून देण्यात आली आहे.