भिवंडीत आक्षेपार्ह स्टेटस ठेवणाऱ्या पोलिस कर्मचाऱ्यावर निलंबनाची कारवाई

आक्षेपार्ह स्टेटस ठेवल्याने
पोलिस कर्मचारी निलंबित

भिवंडी, ता. ११ (वार्ताहर) : आक्षेपार्ह मजकूर लिहून भावना दुखावणाऱ्या पोलिस कर्मचाऱ्यावर भिवंडी पोलिस उपायुक्त शशिकांत बोराटे यांनी निलंबनाची कारवाई केली. अंकुश रमेश सानप असे कारवाई करण्यात आलेल्या पोलिस शिपायाचे नाव आहे.
पोलिसांनी दिलेल्या माहितीनुसार, कोनगाव पोलिस ठाण्यात कार्यरत पोलिस शिपाई अंकुश सानप याने ७ मे रोजी टेमघरगाव येथील गावदेवी यात्रेच्या दरम्यान पुजारी पारंपरिक पद्धतीने पूजा करीत असतानाचा व्हिडिओ आपल्या मोबाईलच्या स्टेटसवर ठेवून त्याखाली समाजाच्या भावना दुखावल्या जातील, असा मजकूर लिहिला होता. याबाबत स्थानिक नगरसेवक रोहित चौधरी यांनी सानप यांना विचारणा केली असता त्यांच्यासोबत अरेरावीची भाषा वापरून उद्धटपणाचे वर्तन केले. याबाबत चौधरी यांनी शांतीनगर पोलिस ठाण्यात दिलेल्या तक्रारीची गांभीर्याने दखल घेत पोलिस उपायुक्त शशिकांत बोराटे यांनी ही निलंबनाची कारवाई केली आहे.