बेकायदेशीर पार्किंगवर कारवाईची मागणी

बेकायदा पार्किंगवर कारवाईची मागणी
पोलादपूर, ता. १२ (बातमीदार) : मुंबई-गोवा महामार्गावरील कशेडी ते खेड तालुक्यातील भरणे जाधववाडी ते खोपी फाटा परिसरात वाढत्या बेकायदा पार्किंगमुळे अपघातांचा धोका गंभीर बनला आहे. या पार्श्वभूमीवर मदत ग्रुपचे संस्थापक अध्यक्ष प्रसाद गांधी यांनी संबंधित विभागांना तातडीने कारवाई करण्याची मागणी केली आहे. याबाबत त्यांनी ११ मे रोजी रत्नागिरी जिल्हा प्रशासन, पोलिस विभाग, राष्ट्रीय महामार्ग प्राधिकरण व इतर संबंधित यंत्रणांना पत्र दिले आहे.
या भागात विशेषतः रात्रीच्या वेळी कोणतीही सुरक्षा साधने न वापरता रस्त्याच्या कडेला वाहने उभी केली जात असल्याने वाहतुकीस अडथळा निर्माण होतो. आतापर्यंत सुमारे १० ते १५ अपघात घडल्याचे निदर्शनास आले असून, काहींमध्ये जीवितहानीही झाली आहे. तसेच या परिसरात अधिकृत बस थांबा नसल्याने प्रवाशांना रस्त्याच्या कडेला उभे राहावे लागते, ज्यामुळे धोका वाढतो.
या समस्येवर उपाय म्हणून बेकायदा पार्किंगवर कठोर कारवाई, ‘नो पार्किंग’ फलक, रात्री गस्त वाढविणे, क्रेनद्वारे वाहने हटविणे तसेच बस थांबा उभारण्याची मागणी करण्यात आली आहे.