बनावट संदेशातून लाखोंचा गंडा
बोईसर, ता. १३ (वार्ताहर) : आरटीओ ई-चलानचा बनावट संदेश पाठवून बोईसरमधील एकाला सायबर चोराने नऊ लाख ९९ हजार ९९९ रुपयांचा गंडा घातला आहे. याप्रकरणी बोईसर पोलिस ठाण्यात गुन्हा दाखल आहे.
अब्दुल रहमान रफातुल्ला खान (वय ४१, रा. स्वस्तिक रेसीडेन्सी, बेटेगाव, बोईसर) यांनी याबाबत फिर्याद दिली आहे. पोलिसांनी दिलेल्या माहितीनुसार, फिर्यादीचे मित्र अर्शद चौधरी यांच्या वाहनावर आरटीओ ई-चलान असल्याचा बनावट संदेश पाठवण्यात आला होता. आरोपीने त्यांच्या मोबाईलमधील माहिती चोरून बँकेच्या खात्यातून ९ लाख ९९ हजार ९९९ रुपये परस्पर काढून घेतले. या प्रकरणी भारतीय न्याय संहिता कलम ३१८(४) तसेच माहिती तंत्रज्ञान अधिनियमांतर्गत गुन्हा दाखल करण्यात आला आहे.
