बोईसरमध्ये मंगळसूत्र हिसकावण्याचा प्रयत्न;

मंगळसूत्रासाठी महिलेवर जीवघेणा हल्ला

बोईसर, ता. १३ (वार्ताहर) : मंगळसूत्र हिसकावण्याच्या प्रयत्नात महिलेवर धारदार हत्याराने जीवघेणा हल्ल्याचा प्रकार बोईसरमध्ये घडला आहे. या घटनेमुळे महिला सुरक्षेचा प्रश्न पुन्हा ऐरणीवर आला आहे.
अनुग्रह हॉटेलजवळील मंगलम अपार्टमेंटमध्ये सोमवारी (ता. ११) सायंकाळी ही घटना घडली. पूजा मखवाना (वय २८) श्वानाला चपाती देऊन घरी परतत असताना बिल्डिंगच्या जिन्यात दबा धरून बसलेल्या चोराने त्याच्या गळ्यातील मंगळसूत्र खेचण्याचा प्रयत्न केला; पण पूजा यांनी विरोध केल्याने आरोपीने हातातील धारदार हत्याराने त्यांच्या चेहऱ्यावर वार केला. या वेळी आरडाओरड झाल्याने आरोपी घटनास्थळावरून पसार झाला. याप्रकरणी बोईसर पोलिस ठाण्यात भारतीय न्याय संहिता कलम ३०९(६) अंतर्गत गुन्हा दाखल आहे.
-------------------
हल्लेखोराचा शोध सुरू
आरोपी अंदाजे ३० ते ३५ वर्षांचा असून त्याने निळ्या रंगाचा अर्ध्या बाह्यांचा टी-शर्ट, काळी पॅन्ट आणि काळे शूज घातले होते, अशी माहिती पोलिसांना देण्यात आली आहे.