सीजीएस कॉलनीत पदपथावरील अनधिकृत दुकानांवर कारवाई

सीजीएस कॉलनीत पदपथावरील अनधिकृत दुकानांवर कारवाई
नागरिकांना दिलासा, पादचाऱ्यांचा मार्ग पुन्हा मोकळा

घाटकोपर, ता. १३ (बातमीदार) ः सीजीएस कॉलनी परिसरातील पदपथावर अनधिकृतपणे उभारण्यात आलेल्या दुकानावर मंगळवारी (ता. १२) महापालिकेने धडक कारवाई केली. या कारवाईत पदपथावरील १२ अनधिकृत दुकाने पालिकेने निष्कासित केली. संबंधित विभागाने कारवाई करत पदपथ नागरिकांना चालण्यासाठी मोकळे केले.
स्थानिक नागरिकांकडून नगरसेवक धर्मेश गिरी यांच्याकडे तक्रारी दाखल झाल्या होत्या. त्यानंतर उपायुक्त संतोषकुमार धोंडे, सहाय्यक आयुक्त मारुती पवार यांच्या मार्गदर्शनाखाली सहाय्यक अभियंता भरत केदार यांनी ही मोठी कारवाई केली. या दुकानांमुळे परिसरातील नागरिकांना तसेच पादचाऱ्यांना पदपथांवरून ये-जा करताना मोठ्या अडचणींचा सामना करावा लागत होता. विशेषतः ज्येष्ठ नागरिक, महिला आणि शालेय विद्यार्थ्यांना रस्त्यावरून चालावे लागत असल्याने सुरक्षेचाही प्रश्न निर्माण झाला होता.