विवाहितेच्या आत्महत्येवरून रोष

विवाहितेच्या आत्महत्येवरून रोष
एल्गार कष्टकरी संघटनेचे धरणे आंदोलन

मोखाडा, ता. १५ (बातमीदार) ः बोटोशीपैकी मरकटवाडी येथील विवाहितेने गळफास घेऊन आत्महत्या केली आहे. या प्रकरणात पोलिसांनी अकस्मात मृत्यूची नोंद केली आहे; मात्र तिला आत्महत्येस प्रवृत्त केल्याचा आरोप करीत सासरच्या मंडळींवर गुन्हा दाखल करावा, या मागणीसाठी एल्गार कष्टकरी संघटनेने धरणे आंदोलन केले.
मोखाड्यातील मरकटवाडी येथील शोभा कामडी या विवाहितेने शेतावरच्या घरात १ मे रोजी गळफास घेत आत्महत्या केली होती. याप्रकरणी पोलिस ठाण्यात अकस्मात मृत्यूची नोंद आहे; मात्र सासरच्या लोकांनी तिला आत्महत्येस प्रवृत्त केल्याप्रकरणी पोलिस ठाण्यात तक्रार दाखल करावी, अशी मागणी माहेरच्यांनी केली आहे.
------------------
तपासानंतर कारवाई
एल्गार कष्टकरी संघटनेचे अध्यक्ष भगवान मधे यांच्या नेतृत्वात रणरणत्या उन्हात मोखाडा पोलिस ठाण्यासमोर आंदोलकांनी धरणे आंदोलन केले. या घटनेप्रकरणी अकस्मात मृत्यूची नोंद केली असून तपासानंतर पुढील गुन्हा नोंद करण्यात येणार असल्याची माहिती मोखाडा पोलिसांनी दिली आहे.