श्रीवर्धन बसस्थानकात ''हिरकणी कक्ष'' सुरू

श्रीवर्धन बस स्थानकात ''हिरकणी कक्ष'' सुरू
स्तनदा माता व बालकांसाठी सुरक्षित, सुसज्ज सुविधेची निर्मिती
श्रीवर्धन, ता. २२ (वार्ताहर) : महिला व बालविकास विभागाच्या जिल्हा वार्षिक योजना २०२५-२६ अंतर्गत उपलब्ध तीन टक्के निधीतून श्रीवर्धन बस स्थानकात स्तनदा माता व बालकांसाठी सुसज्ज ‘हिरकणी कक्ष’ सुरू करण्यात आला आहे.
तालुक्याचे केंद्र आणि उपजिल्हा रुग्णालय असल्याने दररोज अनेक महिला तान्ह्या बाळांसह श्रीवर्धन येथे येतात. प्रवासादरम्यान किंवा शासकीय कामकाजासाठी आलेल्या महिलांना स्तनपान व बालसंगोपनासाठी सुरक्षित जागा उपलब्ध व्हावी, या उद्देशाने हा उपक्रम राबविण्यात आला आहे.
कक्षात आरामदायी आसनव्यवस्था, बाळांसाठी पाळणा, खेळणी, दूरचित्रवाणी संच तसेच शुद्ध पिण्याच्या पाण्याची सुविधा उपलब्ध आहे. बालसंगोपन व आरोग्यविषयक जनजागृती करणारे माहितीफलकही लावण्यात आले आहेत. कक्षाच्या बाहेर सीसीटीव्ही कॅमेरे बसविण्यात आल्याने महिलांच्या सुरक्षिततेला अधिक बळ मिळाले आहे.
या सुविधेमुळे स्तनदा माता व बालकांना प्रवासादरम्यान सुरक्षित, सन्मानपूर्वक आणि आरामदायी वातावरण उपलब्ध होणार आहे.