गेल्या २४ तासात पोलादपूर १२९मी मी पावसाची नोंद

पोलादपूरला मुसळधार पावसाने झोडपले!
पोलादपूर, ता. २४ (बातमीदार) ः गेल्या काही दिवसांपासून दडी मारून बसलेल्या पावसाने अखेर पोलादपूर तालुक्यात दमदार हजेरी लावली आहे. मंगळवारी तालुक्याला मुसळधार पावसाने अक्षरशः झोडपून काढले असून, या वर्षातील पावसाची पहिली शतकी सलामी मोजली गेली आहे. गेल्या २४ तासांत तालुक्यात १२९ मिमी पावसाची नोंद झाली असून, आतापर्यंत एकूण १६३ मिमी पाऊस पडल्याची माहिती पोलादपूर तहसील कार्यालयातून मिळाली आहे.
पावसाच्या दमदार हजेरीमुळे तालुक्यातील ढवली, कामथी, घोडवली, चोळई नद्याच्या पात्रातून पाणी वाहू लागले असून, सावित्री नदीच्या पात्रामध्ये वाढ झाली. तसेच, महामार्ग विभाग व नगरपंचायतच्या नालेसफाईचा बोजवारा उडाला असून, पोलादपूर नजीक महामार्गावर पाणी साचल्याने वाहनचालकांना कसरत करावी लागत आहे. पोलादपूरनजीक प्रभातनगरजवळ पाणी साचल्याने तातडीने जेसीबीच्या साह्यायने चर खोदत पाण्याला वाट मोकळी करून दिली.