झोजीला पास येथे ध्वजारोहण

केसरी टूर्सतर्फे झोजीला पास येथे ११५ फूट उंच राष्ट्रध्वजाचे ध्वजारोहण
पुणे, ता. ८ : कारगिल युद्धातील जवानांच्या बलिदानाला मानवंदना देण्यासाठी झोजीला पास येथील ‘वॉर मेमोरिअल’मध्ये ‘केसरी टूर्स’ परिवारातर्फे ११५ फूट उंच राष्ट्रध्वज उभारण्यात आला. कारगिल विजयदिनाच्या २६व्या स्मृतिदिनानिमित्त ध्वजारोहण करण्यात आले. ‘‘हा राष्ट्रध्वज केवळ एक खांब नसून, भारतीय सैन्याचे शौर्य, बलिदान आणि अस्मितेचे प्रतीक आहे. येणाऱ्या अनेक पिढ्यांना हा ध्वज प्रेरणा देत राहील,’’ असे मत केसरी टूर्सच्या संचालिका झेलम चौबळ यांनी या वेळी व्यक्त केले.
कारगिल विजयदिनानिमित्त द्रास येथील ‘युद्ध स्मारक’ आणि ‘लामोचन व्ह्यू पॉइंट’ येथे भारतीय सैन्यातर्फे एका विशेष कार्यक्रमाचे आयोजन केले होते. या कार्यक्रमात मेजर जनरल के. महेश यांनी केसरीचे व्यवस्थापकीय संचालक शैलेश पाटील आणि वंदना मुळये यांना ‘ऑपरेशन सिंदूर’चा विशेष बॅच देऊन त्यांच्या योगदानाचा गौरव करण्यात आला.
चौबळ म्हणाल्या, ‘‘केसरी टूर्सचे संस्थापक अध्यक्ष केसरीभाऊ पाटील यांनी १९६४ पासून काश्मीर पर्यटनाची सुरुवात केली. तेव्हापासूनच त्यांनी भारतीय सैन्याबद्दल आदर आणि कृतज्ञता व्यक्त करण्याची परंपरा सुरू केली. काश्मीरच्या निसर्गरम्य सौंदर्याची ओळख करून देतानाच, या स्वर्गाचे रक्षण करणाऱ्या जवानांच्या शौर्यगाथा पर्यटकांपर्यंत पोहोचविण्याचे मोलाचे काम त्यांनी केले. त्यांच्या या देशप्रेमाच्या विचारसरणीचा वारसा आज केसरी टूर्स परिवारातील शैलेश पाटील, संगीता पाटील आणि त्यांच्या पुढच्या पिढ्या हिरिरीने पुढे नेत आहेत.’’

‘झोजीला पास’ शौर्याचे प्रतीक
१९४७-४८च्या युद्धात भारतीय सैन्याने झोजीला पास येथे गाजवलेला अतुलनीय पराक्रम आजही स्मरणात आहे. त्यामुळे झोजीला पास हे शौर्याचे प्रतीक आहे. या ऐतिहासिक स्थळी ध्वजस्तंभ उभारण्याचा मान केसरीला मिळणे, ही संपूर्ण केसरी परिवारासाठी अत्यंत अभिमानाची बाब असल्याचे झेलम चौबळ यांनी सांगितले.

‘‘केसरी टूर्ससाठी पर्यटन म्हणजे केवळ प्रवास नव्हे; तर इतिहास, संस्कृती आणि देशप्रेमाची अनुभूती आहे. ‘स्वातंत्र्यवीर यात्रा’, ‘कारगिल विजय यात्रा’, ‘भारत दर्शन’ यांसारख्या संकल्पनांवर आधारित टूर्सद्वारे पर्यटकांना युद्धस्मारकांना भेटी, सैनिकांशी संवाद आणि सैनिकांच्या अनुभवांची ओळख करून देण्यात येते.’’
- झेलम चौबळ, संचालिका, केसरी टूर्स