मुरलीधर मोहोळ यांची घोषणा

समुद्रातील पहिले विमानतळ पालघरमध्ये!
नागरी उड्डाण राज्यमंत्री मुरलीधर मोहोळ यांची घोषणा
सोलापूर, ता. १५ ः २०१४ मध्ये देशात ७४ विमानतळे होती. आता ही संख्या १६३वर पोहोचली आहे. केंद्र सरकारने २०० विमानतळे उभारण्याचा संकल्प केला आहे. दोन आंतरराष्ट्रीय विमानतळे असणारे मुंबई हे एकमेव शहर आहे. त्यानंतर आता देशातील समुद्रामधील पहिले विमानतळ पालघरला उभारण्यात येणार असल्याची घोषणा केंद्रीय नागरी उड्डाण राज्यमंत्री मुरलीधर मोहोळ यांनी केली. सोलापूर-मुंबई विमानसेवेच्या उद्‍घाटन सोहळ्यात ते बोलत होते.
देशात उड्डाण योजनेंतर्गत ६३७ मार्ग कार्यान्वित असून, ९९ विमानतळे जोडली आहेत. या योजनेतून दीड कोटी प्रवाशांनी प्रवास केला. मागील १० वर्षांत विमानांनी प्रवास केलेल्या प्रवाशांची संख्या ३८ कोटी असून, येत्या वर्षभरात १२० नवीन शहरे जोडली जाणार आहेत. त्याद्वारे साडेचार ते पाच कोटी लोक प्रवास करतील. वाढत्या विमानसेवेमुळे प्रवाशांची संख्या वाढली असून, आता भारत विमानसेवा पुरविणारा जगात तिसऱ्या क्रमांकावर आल्याचे मोहोळ म्हणाले.