दुबार भात पिकाला धोका

रसायनी, ता. २ (बातमीदार)ः रसायनी परिसरात भात कापणीचे काम सुरू झाली आहेत. यंदा दुबार भाताचे पीक चांगले आल्‍याने शेतकरी आनंदात आहे. मात्र मंगळवारी(ता.२) परिसरात पावसाच्या सरी कोसळल्‍याने शेतकऱ्यांची काळजी वाढली. खराब हवामान, अवकाळी पावसामुळे हातातोंडाशी आलेला घास वाया जाईल, या भीतीने शेतकरी धास्तावले असून कापणी केलेला भात भिजू नये, म्‍हणून खबरदारी घेत आहे.
नदी काठच्या गावातील शेतकऱ्यांना पाताळगंगा आणि रिस नदीच्या पाण्याचा, वासांबे- मोहोपाडा येथे एमआयडीसीच्या जलशुद्धीकरण केंद्रांमधून सोडण्यात येणाऱ्या सांडपाण्याचा याशिवाय जांभिवलीतील शेतकऱ्यांना माणिक गडाच्या पायथ्याशी असलेल्या बामणोली धरणाच्या पाण्याचा आधार आहे. रसायनी पाताळगंगा परिसरातील सिंचनाचा आधार असलेले शेतकरी दुबार भात आणि भाजीपाल्याचे पीक घेत आहे. यंदाच्या हंगामात परिसरातील शेतकऱ्यांची भात लावणीची कामे फेब्रुवारी महिन्यात पहिल्या आठवड्यात वेळेत पूर्ण झाली. सुरुवातीला पेरणी, रोपांची वाढ आणि त्यानंतर लावणीसाठी दीड-दोन महिने अनुकूल आणि पोषक वातावरण असल्याने पिकाची वाढ चांगली झाली असून काही ठिकाणी कापणीही सुरू करण्यात आली आहे.
गेल्‍या आठवड्यात रसायनी परिसरात पावसाच्या हलक्या सरी पडल्या होत्या, तसेच वासांबे मोहोपाडामध्ये मंगळवारी सकाळीही पुन्हा हलक्या सरी पडल्या. पावसामुळे कोणत्याही प्रकारचे नुकसान झाले नाही, मात्र शेतकऱ्यांची तसेच वीट व्यावसायिकांची तारांबळ उडाली. सध्या तापमान वाढले असून ढगाळ वातावरणामुळे उष्‍माही वाढला आहे. त्‍यातच अधूनमधून पाऊस येत असल्‍याने शेतकऱ्यांची चिंता वाढली आहे.

दोन दिवसांपूर्वी कापणीचे काम सुरू केली आहे. दरम्यान ढगाळ वातावरणामुळे उकाडाही वाढला आहे. कापणीनंतर पुढील काही दिवस भात रचून ठेवणार आहे. खराब हवामान निवळल्यावर झोडपणीचे काम करणार आहे.
- वामन दळवी, वासांबे मोहोपाडा, शेतकरी
..............

रेवदंड्याला पावसाने झोडपले
रेवदंडा, ता. २ (बातमीदार)ः तापमानाचा पारा वाढल्‍याने अवकाळी पावसाची शक्‍यता वर्तवण्यात आली होती. मंगळवारी पहाटे चारच्या सुमारास पावसाच्या जोरदार सरी कोसळल्‍या. पावसामुळे हवेत सुखद गारवा निर्माण झाल्याने नागरिक सुखावले. तर आंब्याची प्रतवारी घसरण्याच्या शक्‍यतेने बागायतदार अडचणीत आले आहेत.

................