सलग सुट्यामुळे बँकेतील आर्थिक व्‍यवहारावर ताण

सलग सुट्यांमुळे बँकेतील आर्थिक व्‍यवहारावर ताण
रेवदंडा, ता. १५(बातमीदार) : मागील आर्थिक वर्ष संपताना आणि आणि नवीन वर्ष सुरू झाल्यांनतर पहिल्या पंधरवड्यात भरपूर सुट्ट्या आल्याने आज ( ता. १५) रोजी अनेक बँका, डाकघर, पतसंस्था या ठिकाणी ग्राहकांची आर्थिक व्यवहार करण्यासाठी मोठ्या प्रमाणात वर्दळ होती. यामुळे वयोवृद्धांना सर्वाधिक त्रास जाणवला, तर बँकेतील आर्थिक व्‍यवहारावरदेखील ताण दिसून आला.
१० एप्रिलला महावीर जयंतीची सार्वजनिक सुट्टी नंतर शुक्रवारी एक दिवस व्यवहार सुरू होते, तर दुसरा शनिवार व रविवारची सुट्टी तसेच सोमवारी आंबेडकर जयंतीची सार्वजनिक सुट्टी आल्याने सलग तीन दिवस बॅंका बंद होत्या. त्‍यामुळे विविध आर्थिक व्यवहार खोळंबले होते. ग्रामीण भागात तर सुट्टया पैशांची चांगलीच चणचण जाणवली. ऑनलाइन व्यवहारामुळे नागरिकांना काहीसा लाभ मिळाला. त्‍यामुळे मंगळवारी बँकाचे व्‍यवहार सुरू झाल्याने अनेक ठिकाणी गर्दी दिसून येत होती. अनेक बॅंकेत सेवानिवृत्तधारक निवृत्तिवेतन घेण्यासाठी मोठ्या प्रमाणात आले होते, मात्र काहींचे एप्रिल, मार्चचे निवृत्ती वेतन अद्याप आले नसल्याने त्‍यांची अडचण झाली, तर काही शेतकरीवर्गाने नवीन पीक कर्ज योजनेसाठी बँकेत गर्दी केली होती. दरम्यान, पुन्हा शुक्रवारी गुडफ्रायडेला सार्वजनिक सुट्टी असल्याने आर्थिक व्यवहारावर परिणाम जाणवत आहे.