चौल नाक्‍यावरील खड्ड्यांमुळे वाहनचालक त्रस्‍त

चौल नाक्‍यावरील खड्ड्यांमुळे वाहनचालक त्रस्‍त
रेवदंडा, ता. २ (बातमीदार) ः अलिबाग तालुक्यातील चौल गावाचा मुख्य प्रवेशद्वार समजला जाणारा चौल नाक्‍यावर सध्या खड्डे असल्याने वाहनचालकांसह नागरिकांना कसरत करावी लागत आहे. गेल्या अनेक वर्षांपासून या नाक्याची दुरवस्था सुरू असून प्रशासनाकडून दुर्लक्ष होत असल्याने नागरिकांमध्ये तीव्र संताप व्यक्त केला जात आहे.
चौल नाक्यावरून अलिबाग, मुरूड, रोहा, नागोठणे अशा विविध भागांकडे दैनंदिन मोठ्या प्रमाणात प्रवास केला जातो. अनेक नोकरदार, विद्यार्थी, रुग्ण आणि पर्यटक या मार्गाचा नियमित वापर करत असतात. विशेषतः मुरूड या पर्यटन स्थळाकडे जाणाऱ्या वाहनांची गर्दी सतत असते. मात्र, रस्त्यातील खोल खड्डे व चिखलांमुळे वाहन चालवणे अत्यंत धोकादायक झाले आहे. अनेक वाहनचालकांना खड्ड्यांचा अंदाज न आल्यामुळे अपघातांची शक्यता वाढली आहे. रेवदंडा बाजारपेठ, विक्रम विनायक मंदिर, लोखंड शुध्दीकरण प्रकल्प, रोहा औद्योगिक वसाहत, राष्ट्रीयकृत बँका आणि खाजगी रुग्णालये या साऱ्यांसाठी चौल नाका हा मुख्य मार्ग आहे. त्यामुळे येथूनच जीवनावश्यक वस्तूंची खरेदी व दैनंदिन कामासाठी नागरिकांना प्रवास करावा लागतो. मात्र सध्याच्या रस्त्याच्या अवस्थेमुळे तो प्रवास म्हणजे संकटाची वाट ठरतोय.