जनतेच्या समस्या सोडवण्याचे खासदारांचे आवाहन

वडखळ, ता. ९ (बातमीदार) : राष्ट्रवादी काँग्रेसच्या कार्यकर्त्यांनी जनतेच्या समस्या सोडवण्यासाठी प्रयत्न करावेत. जेएसडब्ल्यू कंपनीमध्ये स्थानिकांना रोजगार देण्याचे काम करावे, असे आवाहन खासदार सुनील तटकरे यांनी राष्ट्रवादी काँग्रेस कार्यालयाच्या उद्‍घाटन प्रसंगी केले. रायगड जिल्हा चिटणीस आत्माराम म्हात्रे यांचे जेएसडब्ल्यू कंपनीच्या गोवा गेटवरील राष्ट्रवादी काँग्रेस झोतिरपाडा विभाग कार्यालयाचे उद्‍घाटन खासदार सुनील तटकरे यांच्या हस्ते करण्यात आले. याप्रसंगी पेण विधानसभा मतदारसंघ अध्यक्ष नरेंद्र ठाकूर, तालुकाध्यक्ष दयानंद भगत, जिल्हा उपाध्यक्ष उदय जवके, जिल्हा चिटणीस आत्माराम म्हात्रे, ओबीसी सेलचे रायगड जिल्हा उपाध्यक्ष यशवंत घासे, छगन म्हात्रे, मोरेश्र्वर म्हात्रे, प्रकाश बांधणकर, माजी जिल्हा परिषद सदस्य गजानन बोरकर, दत्ताराम म्हात्रे, परशुराम म्हात्रे, तुलशीदास कोठेकर उपस्थित होते. पक्षाचे ध्येय धोरणावर विश्र्वास ठेवणारे तुम्ही कार्यकर्ते आहात. या कार्यालयाचा उपयोग नागरिकांच्या समस्या सोडवण्यासाठी करा. येथील स्थानिकांना येथील कंपनीत रोजगार मिळाला पाहिजे, असे तटकरे यांनी सांगितले.