Accident : ओला कचरा वाहून नेणाऱ्या गाड्यांतून पडणाऱ्या द्रवामुळे दुचाकींचा अपघात

डोंबिवली - कल्याण डोंबिवली महापालिकेच्या ओला कचरा वाहून नेणाऱ्या गाड्यांतून रस्त्यावर सांडणाऱ्या द्रव्यामुळे दुचाकींचे अपघात होत आहेत. बुधवारी सकाळी ठाकुर्ली येथील 90 फिट रोडवर सांडलेल्या चिकट द्रव्यावरून घसरून एक दुचाकीस्वराचा अपघात घडला आहे. यात त्याच्या हाता पायाला जखमा झाल्या आहेत.

कल्याण डोंबिवली महानगरपालिकेच्या घनकचरा विभागाकडून ओला व सुका कचरा वेगवेगळा वाहून नेला जातो. ओला कचरा वाहून नेणाऱ्या कचरा गाड्या या जुन्या झाल्या असून ओला कचऱ्यातून निथळणारे पाणी चिकट द्रव्य स्वरूपात स्रावते. हे पाणी रस्त्यावर सांडत असल्याने त्यावरून दुचाकी गाड्या घसरून अपघात घडत आहेत. बुधवारी सकाळी 90 फिट रोडवरून कचरा वाहून नेणारी गाडी गेली होती. त्यातून चिकट द्रव्य रस्त्यावर सांडलेले असल्याने दुचाकीस्वार घसरून त्याच्या हातापायाला दुखापत झाली.

याआधी ही कल्याण डोंबिवली परिसरात असे अनेक दुचाकीस्वारांचे अपघात रस्त्यावर सांडलेल्या चिकट द्रव्यामुळे झाले आहेत. पालिका प्रशासनाच्या निदर्शनास येऊन देखील प्रशासन त्याकडे गांभीर्याने पहात नसल्याचे दिसते.

यासंदर्भात घनकचरा व्यवस्थापन अधिकारी अतुल पाटील यांना विचारणा केली असता या संदर्भात जुन्या गाड्या बदलून या ठिकाणी नवीन गाड्या लवकरच येणार असल्याचे त्यांच्याकडून सांगण्यात आले.