Navi Mumbai: फेरफटका मारण्यासाठी घराबाहेर पडले आजोबा अन् दोघा चोरट्यांनी साधला डाव

Navi Mumbai: भरधाव दुचाकीवरून आलेल्या दोघांनी फेरफटका मारण्यासाठी घराबाहेर पडलेल्या एका ८९ वर्षीय वृद्धाच्या गळ्यातील ६० हजार रुपये किंमतीची सोन्याची चैन खेचून पलायन केल्याची घटना मंगळवारी (ता. १२) सकाळी वाशी सेक्टर-२८ मध्ये घडली. वाशी पोलिसांनी या घटनेतील दोघा लुटारुंविरोधात जबरी चोरीचा गुन्हा दाखल करून त्यांचा शोध सुरू केला आहे.

या घटनेतील तक्रारदार वल्लभदास शहा (८९) हे कोपरखैरणे सेक्टर-११ भागात राहण्यास आहेत. मंगळवारी सकाळी ९ वाजण्याच्या सुमारास ते आपल्या घरातून फेरफटका मारण्यासाठी बाहेर पडले होते.

दरम्यान, ते चालत वाशी सेक्टर-२८ मध्ये आले असता विजय डेअरीसमोरून रस्ता ओलांडून जात असताना भरधाव दुचाकीवरून आलेल्या दोघा लुटारुंनी वल्लभदास यांच्या गळ्यातील ६० हजार रुपये किंमतीची सोन्याची चैन खेचून पलायन केले.

या घटनेनंतर वल्लभदास यांनी नातेवाईकांसह वाशी पोलिस ठाण्यात तक्रार दाखल केली. त्यानुसार पोलिसांनी अज्ञात लुटांरुविरोधात जबरी चोरीचा गुन्हा दाखल करून त्यांचा शोध सुरू केला आहे.