Election and Wedding Season : मतदानाने साधलाय लगीनघाईचा मुहूर्त ; दोन महिन्यात अवघे १२ शुभ दिवस

पनवेल : लोकसभा निवडणुकीची घोषणा झाल्यानंतर आचारसंहिता लागू करण्यात आली आहे. महाराष्ट्रात १९ एप्रिल, २६ एप्रिल, ७ मे, १३ मे, २० मे या दिवशी पाच टप्प्यांत मतदान होणार आहे. याच काळात लग्नाचे मुहूर्त असल्याने मंडप, मंगल कार्यालये आणि केटरिंग व्यावसायिकांना तारेवरची कसरत करावी लागणार आहे. लोकसभा निवडणुकीची धामधूम सुरू झाल्यानंतर निवडणूक आयोगाकडून मतदान आणि मतमोजणीची तयारी सुरू करण्यात आली आहे. दुसरीकडे लोकसभा निवडणुकीच्या काळातच लग्नाचे मुहूर्त येत असल्याने नियोजित वधू-वरांच्या कुटुंबीयांवरसुद्धा बंधने आली आहेत. दरवर्षी मे महिन्यामध्ये लग्नाचे मुहूर्त अधिक असतात.

जूनमध्ये पावसाळा सुरू होतो. त्यानंतर शेतकऱ्यांना शेतीची कामे; तर शाळा, कॉलेज सुरू होत असल्याने पालकांची धावपळ असते. त्यामुळे मे महिन्यात अधिक लग्न असतात; मात्र यंदा मे महिन्यात दोनच मुहूर्त असून २९ जूनपर्यंत मुहूर्तच नाहीत. यामुळे एप्रिल महिन्यातील असलेल्या सर्वच तारखांना मंगल कार्यालये, बॅण्ड आदींची बुकिंग फुल्ल झाली असल्याचे चित्र आहे.

दरम्यान, यापूर्वी लग्नाच्या तारखा काढलेल्या वधू व वर पित्यांनी मंगल कार्यालये आधीच बुक केली आहेत. मंगल कार्यालयात सर्व सुविधा मिळत असल्याने येथे लग्न करण्यास प्राधान्य दिले जात असल्याचे स्वयंवर मंगल कार्यालयाचे स्वप्नील सोनपावले यांनी सांगितले. दरम्यान, विवाह मुहूर्ताच्या तारखा पाहून बॅण्डदेखील बुक झाले आहेत. मार्च, एप्रिल महिन्यांतील लग्नाच्या सर्व तारखा बुक झाल्या असल्याचे मंगल कार्यालयातील व्यवस्थापकाने सांगितले.

नेहमीचाच पेच

दर पाच वर्षांनी लग्नसमारंभ आणि लोकसभा निवडणुका एकत्र येतात. आचारसंहिता लागू असल्याने आवाज आणि लग्न समारंभाच्या वेळेवर बंधने येत असल्याचे एका मंगल कार्यालय मालकांनी सांगितले. शिवाय निवडणूक आणि लग्नसराईच्या तारखा यांचा ताळमेळ व्यावसायिकांसह वधू-वराच्या कुटुंबीयांना साधावा लागणार आहे.