अंबरनाथमध्ये नवीन वर्षाच्या रात्रीच तरुणाची दगडाने ठेचून हत्या

अंबरनाथ - नववर्षाच्या पहिल्याच रात्री अंबरनाथ मध्ये एका तरुणाची दगडाने ठेचून हत्या (Murder) केल्याचा प्रकार नवीन वर्षाच्या शनिवारी पहिल्या रात्री घडला आहे. या घटनेमुळे शहरात खळबळ उडाली आहे.

अंबरनाथ शहराच्या पश्चिम भागातील पोलीस ठाण्याच्या मागील बाजूस गेल्या अनेक वर्षापासून बंद असलेली डीएमसी कंपनीच्या मोकळ्या मैदानात रवी तिवारी या तरुणाचा दगडाने ठेचून खून केल्याचा प्रकार घडला आहे. 

या घटनेची आज रविवारी दुसऱ्या दिवशी पोलिसांना समजताच पोलिसांनी घटनास्थळी धाव घेवून मृतदेहाचा पंचनामा करून तो मृतदेह शवविच्छेदनासाठी उल्हासनगर येथील मध्यवर्ती रुग्णालयात पाठवण्यात आला आहे. या हत्येसंदर्भात पोलिसांनी एका संशयित व्यक्तीला ताब्यात घेतले असून याबाबत अधिक तपास करीत असल्याचे अंबरनाथ पोलिसांनी सांगितले.