चिंचोली कामळज वाळू घाटावर कारवाई

मारतळा - लोहा तालुक्यातील चिंचोली, कामळज येथील गोदावरी पात्रातून बिहारी मजुरांच्या साहाय्याने अवैध वाळू उपसा करणारे ११ तराफे पकडून त्याची मोडतोड करत जाळून नष्ट केले. तर अवैध वाळू वाहतूक करणारे दोन टिप्पर पकडले, ही धडक कारवाई तहसीलदार व्यंकटेश मुंडे यांच्या गौण खनिज प्रतिबंधक पथकाने बुधवारी (ता. १३) सकाळपासून सायंकाळी उशीरापर्यंत चालूच होती.

कापसीचे मंडळ अधिकारी चंद्रशेखर सहारे यांनी याबाबत माहिती दिली. लोहा तालुक्यातील चिंचोली, कामळज हे शेवटच्या टोकावरील गोदावरी नदीच्या काठावरील गावे असून बिहारी मजुर तरफ्याच्या साहाय्याने अवैध वाळू उपसा करत होते. डॉ. शरद मंडलिक यांचे मार्गदर्शनाखाली तहसीलदार मुंडे यांच्या गौण खनिज प्रतिबंधक पथकाने बोटीच्या सहायाने बुधवारी बोटीतून टेहळणी करत ११ तराफे पकडून एकत्र करत जाळून नष्ट केले. अवैध वाळू वाहतूक करणारे दोन टिप्पर (क्रमांक एम एच १४- एएस ८०७१) आणि (एम एच २६- एडी ३७९०) पकडून दंडात्मक कारवाईसाठी उस्माननगर पोलीस ठाण्यात लावण्यात आल्याची माहिती देण्यात आली. या कारवाईत तहसीलदार मुंडे, नायब तहसीलदार अशोक मोकाले, मंडळ अधिकारी चंद्रशेखर सहारे, डी. एल कटारे, तलाठी मारुती कदम, सतीश शिंदे, मोतीराम पवार, परशुराम जाधव, संदीप कल्याणकर, राजू इंगळे, मनोज जाधव, संतोष अस्कुलकर, एकांडे, भुरेवार, पाईकराव, निकम आदींनी सहभाग घेतला.