अर्धापूर नगरपंचायत झाली थकबाकीमुक्त; 29 लाख रुपयांचा केला एकरकमी भरणा

नांदेड : स्थानिक स्वराज्य संस्थांकडे पाणीपुरवठा व पथदिव्यांची अनेक वर्षापासून सुरू असलेली थकबाकी वसूल करण्यासाठी महावितरण अविरत प्रयत्न करत आहे. या प्रयत्नातूनच अर्धापूर नगरपंचायतीने 29 लाख 17 हजार 810 रूपयांची एकरकमी थकबाकी भरून थकबाकीमुक्त नगर पंचायत होण्याचा बहूमान प्राप्त केला आहे.

महावितरणच्या अर्धापुर उपविभागाअंतर्गत अर्धापुर नगर पंचायतचे पाणीपुरवठा योजनेचे चालू बिलासह 11 लाख 81 हजार 990 रूपयांचे वीजबील थकीत होते तर पथदिव्याचे 17 लाख 35 हजार 820 रूपये वीजबील थकीत होते. मार्च अखेर थकबाकी वसूलीसाठी महावितरण पत्र, सुसंवाद त्याचबरोबर सातत्याने पाठपुरावा करुन थकीत वीजबील वसूलीसाठी प्रयत्न करत आहे. नांदेड ग्रामीण विभागाचे कार्यकारी अभियंता आर. पी.चव्हाण यांनी सातत्याने पाठपुरावा करून अर्धापूर नगर पंचायतीकडे थकीत असलेले एकोणतीस लक्ष सतरा हजार आठशे दहा रुपये एकरकमी आरटीजीएसच्या माध्यमाव्दारे वसूल करण्यात यश मिळवले. 

हेही वाचा - जवळा बाजार येथील जुगार अड्ड्यावर धाड, पावनेचार लाखाचा मुद्देमाल जप्त, तेरा जुगाऱ्याविरुद्ध गुन्हा दाखल

थकबाकीमुक्त झाल्यामुळे अर्धापूर नगरपंचायतीचे मुख्य अधिकारी सुनिल जगताप व नगराध्यक्ष लायक शेख यांचा महावितरणच्या वतीने पुष्पगुच्छ देवून कार्यकारी अभियंता आर. पी. चव्हाण यांनी सत्कार केला. याप्रसंगी उपकार्यकारी अभियंता श्री कादरी, सहाय्यक लेखापाल डी. डी. इंगोले व उच्चस्तर लिपिक राजकुमार सिंदगीकर उपस्थित होते. संपूर्ण थकबाकी वसूल केल्याबद्दल अर्धापूर नगरपंचायत व नांदेड ग्रामीण विभागाच्या सर्व कर्मचाऱ्यांचे नांदेड परिमंडळाचे मुख्य अभियंता दत्ताञय पडळकर आणि अधीक्षक अभियंता संतोष वाहणे यांनी अभिनंदन केले.