मुदखेड पंचायत समितीच्या माजी सभापतींची आत्महत्या

मुदखेड (जिल्हा नांदेड) : मुदखेड पंचायत समितीच्या माजी सभापती तथा विद्यमान सदस्या शिवकांता शत्रुघ्न गंड्रस (वय ३५) रा.डोणगाव (ता. मुदखेड) यांनी रविवारी (ता. २७) त्यांच्या राहत्या घरी गळफास घेऊन आत्महत्या केल्याची घटना घडली. या प्रकरणी मुदखेड पोलिस ठाण्यात आकस्मिक मृत्यूची नोंद करण्यात आली आहे. रात्री उशिरा त्यांच्या पार्थीवावर अंत्यसंस्कार करण्यात आले. या घटनेमुळे राजकीय वर्तुळात खळबळ उडाली आहे. 

शिवकांता गंड्रस यांनी डोणगाव (ता. मुदखेड) येथील त्यांच्या राहत्या घरी रविवारी (ता.२८) रोजी सायंकाळी साडेपाचच्या दरम्यान गळफास घेऊन आत्महत्या करुन आपली जीवनयात्रा संपवली. शिवकांता गंड्रस यांच्यावर आत्महत्या करण्याची वेळ का आली? हे अद्याप तरी स्पष्ट झाले नाही. सदरील घटना घडल्याचे माहीत होताच घटनेची माहिती नातेवाईकांनी मुदखेड पोलिसांना दिली. माहिती मिळताच पोलिस निरीक्षक सुनिल निकाळजे यांनी आपल्या सहाकीर अधिकाऱ्यांसोबत घटनास्थळी भेट दिली. पंचनामा करून मृतदेह खाली उतरून उत्तरीय तपासणीसाठी मुदखेड ग्रामीण रुग्णालयात दाखल केला. रात्री साडेदहाच्या सुमारास माजी सभापती शिवकांता गंड्रस यांच्या पार्थीवावर अंत्यसंस्कार करण्यात आला. 

हेही वाचा - शेतकऱ्यांसाठी गुड न्यूज : अखेर ‘त्या’ सोयाबीन उत्पादक कंपनीवर नांदेडात गुन्हा दाखल

पंचायत समितीच्या अडीच वर्ष सभापती होत्या

शिवकांता गंड्रस या मुगट पंचायत समिती गणातुन काँग्रेस पक्षाकडुन मागील साडेतीन वर्षापूर्वी झालेल्या निवडणूकीत निवडून आल्या होत्या. त्यानंतर त्या पंचायत समितीच्या सभापती झाल्या. त्यांनी अडीच वर्ष सभापतीपदाचा उत्तम कारभार सांभाळला. सध्या त्या विद्यमान पंचायत समिती सदस्या म्हणून पल्या गणात कार्यरत होत्या. परंतु त्यांनी आत्महत्या केल्याने एकच खळबळ उडाली. त्यांच्या पश्चात पती शत्रुघ्न गंड्रस, एक मुलगा, एक मुलगी, सासरे असा परिवार आहे.

आत्महत्येचे कारण अद्याप समजले नाही

आत्महत्येचे कारण अद्याप समजले नसुन तपास पोलिस निरीक्षक निकाळजे यांच्या मार्गदर्शनाखाली सहाय्यक पोलिस निरीक्षक श्री. भाले, हवालदार श्री. पवार, श्री. शिंदे करत आहेत. पत्नीच्या आत्महत्येचा धक्का पतीला सहन झाला नसल्याने तिच्या चितेला भडाग्नी दिल्यानंतर काही तासातच त्यांनाही तिव्र ह्रदयविकाराचा झटका आला आहे. त्यांना तातडीने नांदेडच्या एका खासगी रुग्णालयात दाखल केले असून त्यांची प्रकृती धोक्याबाहेर असल्याचे नातेवाईकांनी सांगितले.