Nanded Crime: नांदेडमधील आठ लाख चोरी प्रकरणी चार जणांना अटक

नांदेड: शहरातील गोकुळनगर भागातील बालाजी ट्रेडर्स सिमेंट दुकानातून खंजरचा धाक दाखवून चोरांनी सात लाख ७० हजार रुपयांची सुटकेस बुधवारी (ता. ११) रात्री पळवून नेली होती. या प्रकरणी स्थानिक गुन्हे शाखेच्या पथकाने चार जणांना सापळा रचून अटक केली. त्यांच्याकडून तीन लाख ५६ हजार रुपयांचा मुद्देमाल जप्त करण्यात आला आहे. अजून एक संशयित असून, तो फरार आहे.

या प्रकरणी शिवाजीनगर पोलिस ठाण्यात गुन्हा नोंद होता. पोलिस अधीक्षक प्रमोद शेवाळे यांच्या सूचनेनुसार स्थानिक गुन्हे शाखेचे पोलिस निरीक्षक द्वारकदास चिखलीकर आणि त्यांच्या पथकाने राहुल ऊर्फ मुन्ना महेंद्र थोरात (वय २५), विशाल व्यंकटी वाघमारे (वय २५), संतोष आनंदराव झडते (वय २३, तिघेही रा. श्रावस्तीनगर, नांदेड) आणि दीपक नरहरी वाघमारे (वय २६, रा. कोटीतीर्थ, नांदेड) या चौघांना सापळा रचून अटक केली. त्यांनी गुन्ह्याची कबुली दिली असून, त्यांच्यासोबत असलेला मारोती ऊर्फ बाळू हरीभाऊ सरोदे हा अद्याप फरार आहे. पोलिस त्याचा शोध घेत आहेत. या चार संशयित आरोपींना तपासकामी शिवाजीनगर पोलिस ठाण्याच्या ताब्यात देण्यात आले आहे.

पोलिस निरीक्षक चिखलीकर यांच्यासह सहायक पोलिस निरीक्षक पांडुरंग भारती, फौजदार आशिष बोराटे, दत्तात्रय काळे, सचिन सोनवणे, पोलिस जमादार करले, संजय केंद्रे, पोलिस नायक बालाजी तेलंग, म्हैसनवाड, अफजल पठाण, पोलिस शिपाई देवा चव्हाण, विलास कदम, गणेश धुमाळ, राजेंद्र सिटीकर, बजरंग बोडके, राजू पुलेवार, हनुमान ठाकूर, बालाजी मुंडे यांनी ही कारवाई केली.