नांदेडच्या ‘त्या’ बँकेतील कर्मचाऱ्यांवर क्वॉरंटाइन होण्याची वेळ 

नांदेड : बुधवारी (ता.दहा) दिवसभरात दहा नवीन पॉझिटिव्ह रुग्ण आढळुन आले; तर दोघांचा मृत्यू झाला. त्यानंतर बुधवारी संध्याकाळपर्यंत ७९ स्वॅब नमुन्यांची तपासणी सुरू होती. गुरुवारी (ता.११) सकाळी काही स्वॅब अहवाल प्राप्त झाले. त्यात पुन्हा पाच जणांचा अहवाल पॉझिटिव्ह आला. त्यामुळे जिल्ह्यातील कोरोना बाधित रुग्णांची संख्या २०८ इतकी झाली आहे.
 
गुरुवारी प्राप्त झालेल्या पाच पॉझिटिव्ह रुग्णांमध्ये महावीर चौकातील (कंटेन्मेंट झोन) परिसरातील एका सहकारी बँकेतील एका कर्मचाऱ्याचा समावेश आहे. त्यामुळे या बॅंकेतील कर्मचाऱ्यांमध्ये घबराट झाली असून, जवळपास ७० कर्मचाऱ्यांना क्वॉरंटाइन करण्याची प्रक्रिया महापालिकेच्या आरोग्य विभागाकडून सुरू करण्यात आली आहे.  

हेही वाचा- Corona Update ः नांदेडमध्ये आज पुन्हा पाच पॉझिटिव्ह, संख्या गेली २०८ वर ​

बँकेचे निर्जुंतिकीकरण करण्याचे काम सुरू

एकाच वेळी एखाद्या बँकेतील इतक्या मोठ्या संख्येने कर्मचाऱ्यांना क्वॉरंटाइन करण्याची ही जिल्ह्यातील पहिलीच वेळ असल्याने अनेकांच्या भुवया उंचावल्या आहेत. ‘त्या’ बँकेचे निर्जुंतिकीकरण करण्याचे काम सुरू झाले आहे. ही बँक गुरुद्वारा परिसराला लागुन असल्याने यापूर्वीच बँकेच्या आजुबाजुचा परिसर सील करण्यात आला आहे. तरीदेखील व्यवस्थापनाने बॅंकेचा व्यवहार सुरुच ठेवला होता. परिणामी कर्मचाऱ्यांमध्ये भीतीचे वातावरण होते.  

हेही वाचा- लॉकडाउन: तब्बल 80 दिवसांनी हैद्राबाद- नांदेड- मुंबई विमानसेवा सुरु

बॅंकेचा कारभार नित्याप्रमाणे सुरु होता 

राज्य शासनाने लॉकडाउन शिथिल केले असले तरी, ज्या भागात पॉझिटिव्ह रुग्ण आढळुन येत आहेत, त्या भागात काही नियम व अटी घालुन दिल्या आहेत. परंतु, बहुतेक ठिकाणी शासनाच्या या नियमांची पायमल्ली होत आहे. कर्तव्यावर असणाऱ्या कर्मचाऱ्यांच्या आरोग्याची पुरेशी खबरदारी न घेता या बॅंकेचा कारभार नित्याप्रमाणे सुरु होता. परिणामी बँकेतील सर्व कर्मचाऱ्यांना आज क्वॉरंटाइन होण्याची वेळ आल्याचे एका कर्मचाऱ्याने नाव प्रसिद्ध न करण्याच्या अटीवर मनातील खदखद ‘सकाळ’कडे व्यक्त केली.  

जिल्ह्यात वाढणारी पॉझिटिव्ह रुग्णसंख्या ही काही प्रशासनासाठी चिंतेचा विषय नाही; तर नागरिकांनीदेखील जागृक नागरिक म्हणून जबाबदारीने वागले पाहिजे. अन्यथा नांदेडचा हा आकडा असाच वाढत राहिल्यास नवल वाटणार नाही. त्यामुळे सर्वांनी वेळीच खबरदारी घेणे गरजेचे आहे.