Nanded : चोरीच्या अडीच लाखाच्या आठ दुचाकी जप्त

नांदेड - शहरातील वजिराबाद पोलिस ठाण्यातील गुन्हे शोध पथकाने एका चोरट्याला अटक केली असून त्याच्याकडून चोरी गेलेल्या दोन लाख ४० हजाराच्या आठ दुचाकी जप्त केल्या आहेत. तसेच पोलिसांनी चोरीच्या दुचाकी घेणाऱ्यांवरही कारवाई केली आहे.

नांदेड शहरामध्ये दुचाकी चोरीचे वाढते प्रमाण लक्षात घेता पोलिस अधीक्षक श्रीकृष्ण कोकाटे, अतिरिक्त पोलीस अधिक्षक अबिनाश कुमार, उप विभागीय पोलीस अधिकारी सुरज गुरव यांनी दुचाकी चोरी करणाऱ्या गुन्हेगारांचा शोध घेऊन त्यांच्याकडे बारकाईने

तपास करुन दुचाकी चोरीचे गुन्हे उघडकीस आणण्याबाबतच्या सुचना गुन्हे बैठकीमध्ये दिल्या होत्या. त्यानुसार वजिराबादचे पोलिस निरीक्षक अशोक घोरबांड यांच्या मार्गदर्शनाखाली गुन्हे शोध पथकाचे सहायक पोलिस निरीक्षक शिवराज जमदडे, पोलिस जमादार दत्तराम जाधव, विजयकुमार नंदे, शरदचंद्र चावरे, मनोज परदेशी, बालाजी कदम, इम्रान शेख, भाऊसाहेब राठोड, रमेश सुर्यवंशी यांनी सापळे रचून शोध सुरू केला.

सोमवारी रेल्वेस्थानक परीसरामध्ये सापळा रचून चोरटयांचा शोध घेण्यास सुरूवात केली. त्यावेळी एकाकडे चोरीच्या गुन्ह्यातील दुचाकी आढळुन आल्याने त्यास पकडुन त्याचे नाव विचारले असता त्यांने धम्मपाल उर्फ धम्मा भिमराव कसबे (वय २५, रा. चाभरा, ता. अर्धापूर, हल्ली मुक्काम सांगवी, नांदेड) असे सांगितले.

त्याच्याकडे विचारणा केली असता ती चोरीची असल्याचे सांगितले. त्यानंतर अधिक तपास केला असता त्यांच्या घरी चोरीच्या दोन व चाभरा गावामध्ये पाच दुचाकी विक्री केल्याची माहिती दिली. आरोपीच्या सांगण्यावरुन एकुण आठ दुचाकी जप्त करण्यात आल्या आहेत.

सदर प्रकरणी वजीराबादसह विमानतळ, शिवाजीनगर पोलिस ठाण्यात गुन्हे दाखल असून दुचाकी विकत घेणाऱ्यांवर सुध्दा चोरीचा माल खरेदी केल्याप्रमाणे कार्यवाही करण्यात आली आहे. पुढील तपास पोलिस जमादार विठ्ठल उतकर व प्रदीप खानसोळे करीत आहेत.