शेतकऱ्याने केली श्रमदानातून कॅनालची साफसफाई

तामसा : शेतातून जाणाऱ्या कॅनालच्या पुलाच्या पाईपमध्ये अडकलेल्या झाडे - झुडपांचा शेतीला होणारा धोका टाळण्यासाठी लिंगापुर (ता. हदगाव) शिवारातील शेतकरी ज्ञानेश्वर नागेंद्रराव देवसरकर यांनी स्वतः श्रमदान करीत झाडे-झुडपे, केरकचरा जाळून टाकत पाण्याला वाट मोकळी करून देत शेती वाचविण्याची धडपड चालविली आहे.

शेतकरी देवसरकर यांनी सतत आठ दिवस स्वतःच्या शेतातून जाणाऱ्या पाचशे मीटर लांबीच्या कॅनालमधील झाडे-झुडपे तोडणे व केरकचरा नष्ट करण्यासाठी प्रयत्न केले. इसापूर धरणाचे सदरील कॅनाल असून लिंगापुर शिवारातून हिमायतनगर तालुक्यातील टेंभुर्णी शिवारापर्यंत वाहते. देवसरकर यांच्या शेतातील कॅनलचा बराचसा भाग उंचवट्यावर असल्याने पुलाच्या मागील भागात उन्हाळ्यात सोडण्यात येणारे पाणी व पावसाचे वाहते पाणी मोठ्या प्रमाणात अडते. परिणामी पुलाचे पाईप झुडपे व केरकचऱ्यामुळे तुंबून साठलेल्या पाण्यामुळे कॅनालचा भाग फुटण्याची भीती देवसरकर यांना भेडसावत असते. यामुळे शेतीचे मोठे नुकसान होण्याचा धोका असतो.

वास्तविक पाहता कॅनालची साफसफाई संबंधित विभागाची असते. पण देवसरकर यांनी संबंधितांकडे याबाबत कार्यवाहीबाबत सकारात्मक प्रतिसाद मिळवण्याची कमी शक्यता लक्षात घेऊन स्वतः शेती वाचण्यासाठी प्रयत्नाची पराकाष्टा चालविली आहे. स्वतःच्या शेतातील कॅनालमधील केरकचरा गोळा करून धोकादायक अवस्थेतील वाढलेली झाडे तोडली. संकलित केरकचरा, झाडेझुडपे जाळून टाकण्यात आली. यामुळे कॅनालच्या पुलाजवळ पावसाचे पाणी साठवून शेतीचा संभाव्य धोका तात्पुरत्या स्वरूपात टळला आहे.

शेतातून कॅनाल जाण्यामुळे शेतीला फायदा होईल असे वाटले. पण पुलाजवळचा उंच भाग व अडणारी झाडे झुडपे, केरकचरा यामुळे कॅनाल डोकेदुखी बनला आहे. निसर्गाचा वाईट अनुभव शेती व शेतकऱ्यांच्या पाचवीला पुजला आहे. आपली शेती आपणच वाचवली पाहिजे, याच हेतूने श्रमदान केले आहे.

- ज्ञानेश्वर देवसरकर, शेतकरी.