नांदेड : देहदानातून जीवनदान देण्याचा पाच ज्येष्ठ महिलांचा संकल्प

नांदेड - मरावे पर किर्ती रूपी उरावे, या उक्तीप्रमाणे जीवन संपल्यानंतर आपलाही समाजाच्या गरजूंना काही तरी उपयोग व्हावा, या उद्दात भावनेतून पाच ज्येष्ठ महिलांनी देहदान करत जीवनदान देण्याचा संकल्प केल्याने त्यांच्या सामाजीक दायीत्वाबद्दल सर्वत्र अभिनंदन होत आहे.

सध्या ग्रीन कॅरोडोर फार गरजेचे मानले जात आहे. आपले जीवन संपल्यानंतरही साधारण सहा ते सात जणांना जीवनदान देण्याचा हा संकल्प कौतुकास्पद आहे. सदरील देहदानाची चळवळ आणखी व्यापक करण्याची खरी गरज आहे. जनसामान्यांना त्याचे महत्व पटवून दिले तर शेकडो लोक पुढाकार घेऊ शकतात. हीच सामाजीक भावना जपत शहरातील पाच ज्येष्ठ महिलांनी थेट शासकीय रूग्णालयात जाऊन नियमाप्रमाणे फॉर्म भरून मरणोत्तर देहदानाचा संकल्प केला.

हेही वाचा -  सामान्य रुग्णांपेक्षा कोविडमध्ये रक्त घट्ट होण्याचे प्रमाण दुप्पट, लवकर उपचार न घेतल्यास बेतू शकते जीवावर -

पाचही महिला विपश्यनेचे महत्व, व्यसनमुक्तीसह विविध कार्यात सदैव अग्रेसर असतात. साठी ओलांडलेल्या या महिलामध्ये लेबर कॉलनी येथील शशीकलाबाई पाडमुख, राजाबाई कामठेकर, हर्षनगरच्या अंजनाताई बहात्तरे, भावसार चौक परिसरातील अनिकेतनगर येथील सुभद्राबाई सावंत व पंचशीलनगरच्या कांताबाई आठवले यांचा समावेश आहे.

समाजातील प्रत्येकांनी त्यांचा आदर्श घेऊन मरणोत्तर देहदान केले तर गरजवंताना त्यांचे आयुष्य जगण्यासाठी उपयोगी पडेल, असे सर्वांचे मत आहे. पाच महिलांचा संकल्प समाजातील सर्वच घटकांसाठी प्रेरणादायी ठरत असल्याने त्यांचे सर्वस्तरातून कौतुक व अभिनंदन होत असताना दिसून येत आहे.