विशेष पथकाद्वारे बियाणी हत्येचा तपास | Sakal
sakal

बोलून बातमी शोधा

अशोक चव्हाण

नांदेड : विशेष पथकाद्वारे बियाणी हत्येचा तपास

नांदेड : बांधकाम व्यावसायिक, उद्योजक संजय बियाणी यांची निर्घृण हत्या मनाला वेदना देणारी आहे. हल्लेखोरांविरुद्ध कठोर कारवाईसह घटनेमागे कोणी सूत्रधार असेल तर त्या दृष्टीने पोलिस यंत्रणा तपास करील. या घटनेच्या चौकशीसाठी अतिरिक्त पोलिस अधीक्षक विजय कबाडे यांच्या नेतृत्वाखाली विशेष तपास पथकाची स्थापना केली असून विशेष पोलिस महानिरीक्षक निसार तांबोळी, पोलिस अधीक्षक प्रमोद शेवाळे यांनी याबाबत माहिती दिली आहे. निष्पक्षपातीपणे तपास केला जाईल, असे जिल्ह्याचे पालकमंत्री अशोक चव्हाण यांनी सांगितले. दरम्यान, मराठवाड्यात ठिकठिकाणी या घटनेचा निषेध करण्यात आला.

चव्हाण यांनी बुधवारी (ता. ६) पत्रकार परिषदेत ही माहिती दिली. जिल्हाधिकारी डॉ. विपीन ईटनकर, निसार तांबोळी, प्रमोदकुमार शेवाळे उपस्थित होते. मुंबईत गुरुवारी (ता. ७) गृहमंत्री दिलीप वळसे-पाटील यांच्याशी चर्चा करणार आहे. योग्य दिशेने तपास करण्याबाबतच्या सूचना पोलिसांना केल्या आहेत. संजय बियाणी यांच्या कुटुंबीयांचे सांत्वन केले आहे. त्यांचे म्हणणे तपास अधिकारी लक्षात घेतील, असे चव्हाण यांनी स्पष्ट केले. हत्येमागचे कारण काय, हा मोठा प्रश्न असून, त्याचे सूत्रधार कोण यासह सामान्यांच्या मनात अनेक प्रश्न निर्माण होणे स्वाभाविक आहे. परंतु नागरिकांनी न घाबरता पोलिसांना सहकार्य करावे असे आवाहन त्यांनी केले.

न घाबरता पुढे या

जिल्ह्यातील कायदा व सुव्यवस्था अबाधित राहावी, नागरिकांमध्ये सुरक्षिततेची भावना राहावी, यासाठी जिल्हाधिकारी कार्यालयात सध्याच्या विद्यमान परिस्थितीवर चर्चा झाली. हत्या, धमकीसारख्या घटनांतून संशयितांकडून लोकांमध्ये भीतीचे वातावरण निर्माण करण्याची शक्यता आहे. व्यावसायिकांना धमक्या येत असतील, तर त्यांनी न घाबरता पुढे येऊन पोलिसांना माहिती दिली पाहिजे. नाव गोपनीय ठेवले जाईल, असे चव्हाण यांनी सांगितले.

शोकाकुल वातावरणात अंत्यसंस्कार

दरम्यान, संजय बियाणी यांच्या पार्थिवावर शहरातील गोवर्धन घाट येथे आज दुपारी शोकाकुल वातावरणात अंत्यसंस्कार करण्यात आले. नांदेडसह मराठवाडा, राज्यातील अन्य काही शहरांत मूक मोर्चे काढून या घटनेचा निषेध करण्यात आला. त्याचबरोबर संजय बियाणी यांच्या पत्नीने या घटनेचा निषेध करत संशयितांवर कडक कारवाईची मागणी केली आहे.

Web Title: Nanded Special Squad Investigates The Murder

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
टॅग्स :Nanded