नांदेड : शिक्षकाची अशीही सामाजिक बांधिलकी

निवघा बाजार : आजच्या धावपळीच्या युगात प्रत्येक जण पैशाच्या मागे धावतांना दिसतो. कितीही पैसा असला तरी आणखी जास्त कसा पैसा मिळवता येईल म्हणून माणूस प्रयत्नशील दिसून येतो. परंतू कुठे गोर गरीब कुटूंबाला अनाथ, भिक्षेकरी, गोर गरीबांच्या मुलीच्या लग्ना करीता मदत करायची म्हटल्यांवर अनेक जण नाक मुरडतात. परंतू आजच्या कलयुगात एक अवलीया शिक्षक सटवाजी पवार हे दर वर्षी अनाथ व गोर गरीब मुलीच्या लग्नाकरीता कन्यादान म्हणून संसार उपयोगी साहीत्य भेट देतात.

हदगाव येथे विवेकानंद विद्यालयात शिक्षक म्हणून कार्यरत आहेत. आपल्या कमाईतून ते दर वर्षा दहा टक्के रक्कम दान धर्म करतात. त्यांचे वडील पण गरीबांना अनेकांना मदत करीत होते. त्यांच्याकडून प्रेरणा मिळाल्याचे त्यांनी सांगीतले. सटवाजी पवार गुरुजी यांनी निवघा बाजार परीसरातील तीन महीण्यात अनाथ मुलीच्या लग्नाकरीता जवळपास ५१ हजार रुपयांचे संसार उपयोगी साहीत्य कन्यादान रुपी भेट दिले.

साप्ती येथील वडीलांचे छत्र हरवलेल्या व अत्यंत गरीब असलेल्या आरतीच्या लग्नाकरीता ११ हजार रुपयाची भांडी भेट दिली. तर कोळी येथील मुलीच्या लग्नाकरीता ११ हजार रुपयांची भेट दिली. हदगाव, बोरगाव, जवळगाव येथील अनाथ मुलीच्या लग्नाकरीता साहीत्य घेऊन दिले. सटवाजी पवार यांनी तीन महीण्यात पाच अनाथ मुलीच्या लग्नाकरीता जवळपास ५१ हजारांची मदत केल्याचे त्यांनी सांगीतले.

मी माणसात देव पाहतो, अडल्या नडलेल्यांना मदत करणे ही माझ्या वडीलांची शिकवणी होती. त्यांच्याकडून मला प्रेरणा मिळाली. पुढच्या वर्षी अनाथ मुलींचे लग्न, गरीब विद्यार्थ्यांच्या शिक्षणाकरीता किमान एक लक्ष रुपये मदत या रुपयाने भेट देण्याचा मानस आहे. एखाद्या गरीबाला मदत करुन जे आत्मीक समाधान मिळते ते कुठेच मिळत नाही.

- सटवाजी पवार, शिक्षक.