एसटीचे तीन हजारपैकी केवळ तीनशे कर्मचारी कामावर

नांदेड : क्षेत्रफळाच्या दृष्टीने मराठवाड्यात सर्वात मोठा असलेल्या नांदेड जिल्ह्यात एसटीची नऊ आगार आहेत. विभागाच्या हजेरीपटानुसार प्रशासकीय सेवा, कार्यशाळा, चालक - वाहक असे मिळून दोन हजार ९२४ कर्मचारी आहेत. मागील दोन महिन्यांपासून विभागातील ३१६ कर्मचारी प्रत्यक्ष कर्तव्यावर हजर आहेत. त्यांच्यावरच बस वाहतुकीचा भार आहे.

विलीनीकरणाच्या मागणीसाठी गेल्या अडीच महिन्यांपासून एसटी कर्मचारी काम बंद आंदोलन करत आहेत. त्यामुळे एसटीवर विसंबून असलेल्या प्रवाशांचे हाल सुरु आहेत. सध्या विभागातून केवळ १५ ते १६ बस धावत आहेत. त्यामुळे महामंडळास आजही अपेक्षित उत्पन्न मिळत नाही. दोन हजार ९२४ पैकी दोन हजार ३५९ कर्मचारी अजूनही आंदोलनात आहेत. निलंबित करण्यात आलेल्या ५८ कर्मचाऱ्यांपैकी शासकीय सेवेतील एक तसेच एक चालक व तीन वाहक असे प्रत्यक्ष पाच कर्मचारी कामावर हजर झाले आहेत. चालक-वाहक, शासकीय सेवेतील व कार्यशाळेतील असे ५७ कर्मचारी कामावर गैरहजर तर शासकीय सेवेतील ८३, कार्यशाळेतील ५८, चालक १७, वाहक २८ असे मिळून १८७ कर्मचारी हे साप्ताहिक सुटी, दौरा, अधिकृत रजेवर गेल्याची हजेरी पटावर नोंद आहे.