ग्रामपंचायतींच्या मतमोजणीची तयारी सुरु; मतमोजणी परिसरात प्रतिबंधात्मक आदेश

नांदेड : जिल्ह्यातील सोळा तालुक्यातील 907 ग्रामपंचायतीसाठी पार पडलेल्या मतदानाची मतमोजणी सोमवार (ता. 18 ) रोजी संबंधित तालुक्याच्या ठिकाणी सकाळी 10 वाजेपासून सुरु होणार आहे. याअनुषंगाने जिल्हा प्रशासनातर्फे आवश्यक असलेली सर्व यंत्रणा सज्ज ठेवण्यात आली आहे. मतमोजणी केंद्र परिसरात निवडणूक कामाव्यतिरिक्त इतर व्यक्तीस प्रवेश करण्यास प्रतिबंध करण्यात आले आहे. मतमोजणीच्या ठिकाणी जर त्याच दिवशी आठवडी बाजार असतील तर ते बंद ठेवण्याचे आदेश जिल्हाधिकारी डॉ. विपीन इटनकर यांनी निर्गमीत केले आहेत.  

नांदेड तालुक्यातील ग्रामपंचायतीची मतमोजणी ही माहिती व तंत्रज्ञान इमारत स्थापत्य अभियंत्रिकी विभाग शासकिय तंत्रनिकेतन कॉलेज येथे होणार आहे. तर अर्धापूर तालुक्यासाठी- तहसिल कार्यालय अर्धापूर. भोकर- तळमजला तहसिल कार्यालय भोकर. मुदखेड- तहसिल कार्यालय मुदखेड. हदगाव- मागासवर्गीय शासकिय मुलींचे वसतीगृह तामसा रोड हदगाव. हिमायतनगर- तहसिल कार्यालय हिमायतनगर. किनवट- औद्योगिक प्रशिक्षण संस्था तळमजला किनवट. माहूर- तहसिल कार्यालय माहूर येथील सभागृह.

धर्माबाद- शासकीय तंत्रप्रशाला आयटीआय बासर रोड धर्माबाद. उमरी- तहसिल कार्यालय उमरी. बिलोली- तहसिल कार्यालय बिलोली. नायगाव- तहसिल कार्यालय नायगाव. देगलूर- प्रशासकीय इमारत पंचायत समिती सभागृह देगलूर. मुखेड- तहसिल कार्यालय मुखेड. कंधार- श्री शिवाजी माध्यमिक व उच्च माध्यमिक विद्यालय पानभोसी रोड कंधार तर लोहा तालुक्यातील ग्रामपंचायतीची मतमोजणी शासकीय औद्योगिक प्रशिक्षण संस्था लातूर रोड लोहा येथे मतमोजणी होईल. ही मतमोजणी सकाळी 10 वाजेपासून सुरु होऊन मतमोजणी प्रक्रिया संपेपर्यंत सुरु राहिल.