अनिल देसाई - सुभाष वानखडेंची सदिच्छा भेट

हदगाव : शिवसेना संपर्क अभियान दौऱ्यात शिवसेना नेते अनिल देसाई यांनी माजी खासदार सुभाष वानखेडे यांच्या मातोश्री या निवासस्थानी भेट दिली. या दोन्ही नेत्यांच्या अडीच दशकाच्या मैत्रीला यानिमित्ताने उजाळा मिळाला.माजी खासदार सुभाष वानखेडे यांची मुंबईच्या मातोश्रीवर एक निष्ठावंत शिवसैनिक म्हणून ओळख होती आणि आजही आहेच. मागील तीस वर्षांपूर्वी वानखेडे यांनी शिवसेना मतदारसंघाची धुरा आपल्या खांद्यावर घेतली होती. त्या दरम्यान शिवसेनेचा झंझावात ठेवत वानखेडे यांनी सतत वीस वर्ष मतदारसंघावर अधिराज्य गाजवले होते. सलग तीन वेळा हदगावचे आमदार व एक वेळा हिंगोलीचे खासदार म्हणून त्यांनी मतदारसंघाचे नेतृत्व केले होते. मुंबई वरून शिवसेना नेते मतदारसंघात येत असतात त्या वेळी माजी खासदार वानखेडे यांची भेट आवर्जून घेतात.

शिवसंपर्क अभियानातंर्गत नांदेड जिल्ह्यात खासदार देसाई यांच्या हदगाव दौऱ्यात त्यांनी वानखेडे यांच्या निवासस्थानी भेट दिली. वानखडे यांनीही त्यांचा सत्कार केला आणि या दोन्ही नेत्यांच्या भेटीने सुमारे अडीच वर्षाच्या दशकातील मैत्रीला उजाळा मिळाला. दोघांची जुनीच मैत्री असल्याने या दोन्ही नेत्यात दिलखुलास चर्चा झाल्याची बघावयास मिळाली. या दोन्ही नेत्यांच्या भेटीमुळे शिवसैनिकांनी देखील समाधान व्यक्त केले. यावेळी शिवसेनेचे संपर्कप्रमुख आनंद जाधव, नांदेड उत्तरचे आमदार बालाजी कल्याणकर, जिल्हाप्रमुख दत्ता कोकाटे, माजी आमदार नागेश पाटील आष्टीकर, प्रकाश मारावार आदींची उपस्थिती होती.

भेटीने अनेकांच्या उंचावल्या भुवया

माजी खासदार वानखेडे यांचे शिवसेनेच्या नेत्यांसोबत जिव्हाळ्याचे व मैत्रीपूर्ण संबंध असल्याने मतदारसंघात आलेले सेनेचे नेते माजी खासदार वानखेडे यांची मित्र म्हणून आवर्जून भेट घेतात. त्याच मैत्रीला उजाळा देण्यासाठी शिवसेना नेते देसाई यांनी वानखेडे यांच्या निवासस्थानी भेट दिली. ही कुठलीही राजकीय भेट नसताना देखील काही जणांच्या या भेटीने भुवया उंचावल्या असल्याचेही बघावयास मिळाले.