किनवटच्या शिवणी परिसरात कापूस लागवडीस प्रारंभ

शिवणी (जिल्हा नांदेड ) : किनवट तालुक्यातील शिवणी व परिसरात कापूस लागवड व सोयाबीन पेरणीला सुरुवात झाली आहे. शिवणी परिसरात रोहिण्यामध्ये पाऊस चांगलाच बसला असल्याने या परिसरात शनिवारपासून कापूस लावगड व सोयाबीनची पेरणी करतानाचे चित्र पहावयास मिळत आहे.

किनवट तालुक्यातील शिवणी परिसरात रोहिण्यामध्ये चार ते पाच दिवस चांगला पाऊस झाल्याने या परिसरातील शेतकरी पेरणीत व्यस्त असल्याचे पहावयास मिळत आहेत. कारण कोरोनाच्या लाॅकडाऊनमुळे शेतकरी घरीच असल्याने शेतकऱ्यांना लग्नकार्य करता न आल्याने या वर्षी आपल्या शेतातील कामे वेळेवर करता आली. नांगरटी, वखरणी, कचरा वेचणीची कामे पूर्ण करुन शेतकरी पावसाची वाट पाहत असताना या वर्षी रोहिणी नक्षत्रात पाऊस पडला. त्यामुळे शेती परेणीसाठी सज्ज करुन ठेवल्याने आता पेरणीला सुरुवात करण्यात आली आहे.

हेही वाचा - महावितरण कार्यालयास ठोकले कुलूप; शिवसेनेचे आंदोलन

मृग नक्षत्राच्या अगोदरच पेरणी होताना पाहावयास मिळत आहे. गेल्या वर्षी या भागातील शेतकऱ्यांना पावसाच्या खंडामुळे पेरणी वेळेवर करता आली नाही. त्यामुळे शेतकऱ्यांना दुबार, तिबार पेरणीचा सामना करावा लागल्याने शेतकरी निराश झाला होता. त्यानंतर पाऊस कधी कमी तर कधी जास्त झाल्याने शेतकऱ्यांच्या उत्पन्नात मोठ्या प्रमाणात घट झाली होती. या वर्षी कोरोनाच्या संसर्गामुळे शेतकऱ्यांना पेरणीच्या बियाणांसाठी तारेवरची कसरत करावी लागली. शेतकऱ्यांना कर्ज काढून आपल्या शेतात लागणारे बी- बियाणे खते यांची सोय करावी लागले.

कोरोनाच्या काळात हाताला काम धंदे नसल्याने जवळचे पेरणीसाठी लागणारे बियाणे, खते यासाठी जमा केलेला पैसाही खर्च झाला. त्यामुळे आता पेरणीसाठी लागणारे बियाणे खते उसनवारी व कर्ज काढुन शेतीतील पेरणी करावी लागत असल्याचे बळीराजाकडुन बोलले जात आहे.

संपादन- प्रल्हाद कांबळे