डोंगरगाव येथील शेतात आग लागल्यामुळे ५० एकर ऊस जळून खाक

लोहा (नांदेड) : लोहा तालुक्यातील डोंगरगाव येथे शनिवारी (ता.०६ ) दुपारी तीन वाजेच्या सुमारास ऊसास आग लागून अंदाजीत ४० ते ५० एकर ऊस जळून खाक झाला असल्याची घटना घडली.

नांदेडच्या बातम्यांसाठी येथे क्लिक करा 

याबाबत अधिक माहिती की, दुपारी ३ वाजेच्या सुमारास शेतातून गेलेल्या लाईटच्या ताराचे घर्षन होऊन ऊसाच्या शेतात आगीचे गोळे पडून मोठ्या प्रमाणात आग लागली असल्याची चर्चा आहे. त्या आगीने वरचेवर रौद्र रूप धारण करून जवळपास ४० ते ५० एकर वर आग पसरून शेतातील उभा ऊस जळून खाक होऊन शेतकऱ्याचे लाखो रुपयाचे नुकसान होऊन होत्याचे नव्हते झाले. तसेच शेतात असलेल्या अनेक शेती उपयोगी वस्तू त्यात ठिबक, रबरी पाईप सह अन्य शेती उपयोगी साहित्य नष्ट झाल्याची माहिती समजली.

ताज्या बातम्यांसाठी डाऊनलोड करा ई-सकाळचे ऍप 

याबाबत लोहयाचे तहसिलदार विठठ्ल परळीकर यांच्याशी या घटनेची माहिती बाबत विचारणा करण्यासाठी भ्रमणध्वनीवरून संपर्क साधला असता त्यांनी भ्रमणध्वनी उचलला नाही, तहसीलदार विठ्ठल परळीकर हे लोहा तालुक्याच्या मुख्यालयी राहत नाहीत व कोणाचाही फोन उचलत नाहीत त्यामुळे त्यांच्या विरोधात जनतेमध्ये प्रचंड नाराजी आहे.
 
त्यानंतर महसूल विभागाचे नायब तहसीलदार अशोक मोकले यांच्याशी सदर घटनेबाबत भ्रमणध्वनीवरून विचारणा केली असता त्यांनी सांगितले की, डोंगरगाव येथे ऊस जळाला आहे. सदरील जळालेल्या ऊसाचे पंचनामे करण्याचे आदेश  तलाठी बोंडावार यांना दिले असल्याची माहिती नायब तहसीलदार अशोक मोकले यांनी दिली.