दरोड्याच्या तयारीत असलेल्या दोघांना अटक

नांदेड - शहराच्या बायपास शिवनगर खंडोबा चौक परिसरात दरोडा टाकण्याच्या तयारीत असलेल्या दोघांना भाग्यनगर पोलिसांनी अटक केली. त्यांच्याकडून एक पिस्तुल आणि बारा जीवंत काडतूस जप्त केले आहेत. ही कारवाई भाग्यनगर पोलिस ठाण्याचे पोलिस निरीक्षक सुधाकर आडे यांनी बुधवारी (ता. १५) रात्री केली. यावेळी अंधाराचा फायदा घेऊन तीन चोरटे पसार झाले.

शहरातील बांधकाम व्यावसायिक संजय बियाणी यांची त्यांच्या राहत्या घरासमोर गोळ्या झाडून हत्या केल्यानंतर पोलिसांना शहरात अवैध अग्निशस्त्र रायफल वापर करून दहशत पसरविण्याचा प्रयत्न करणाऱ्या गुन्हेगारांना अटक करण्यास सुरुवात केली आहे.

शहरातील सर्वच ठाणे प्रभारी रात्रीची गस्त घालत आहेत. बुधवारी रात्री भाग्यनगर पोलिसांची गस्त सुरु असताना मिळालेल्या माहितीवरून त्यांनी तरोडा खुर्द परिसरातील खंडोबा चौक भागात शिव रोडवर दरोडा टाकण्याच्या तयारीत असलेल्या रवी नारायणसिंग ठाकूर उर्फ लाला (वय ३२) आणि आनंद यादव (वय २३, दोघेही रा. रवीनगर, जुना कौठा) या दोघांना अटक केली. पोलिस दिसताच अंधाराचा फायदा घेऊन तिघेजण मात्र पसार झाले. पोलिस निरीक्षक सुधाकर आडे यांच्या फिर्यादीवरून भाग्यनगर पोलिस ठाण्यात पाचही आरोपींविरुद्ध गुन्हा दाखल करण्यात आला आहे. तपास सहाय्यक पोलिस निरीक्षक सुशांत किनगे करत आहेत.