Video- नांदेडमध्ये कोरोना लसीकरणाचा ड्राय रन 

नांदेड :  जिल्ह्यातील डॉ. शंकरराव चव्हाण शासकीय वैद्यकीय महाविद्यालय तथा रुग्णालय, श्री गुरु गोविंदसिंघजी स्मारक जिल्हा शासकीय रुग्णालय, बारड येथील आरोग्य केंद्र, मुगट येथील प्राथमिक आरोग्य केंद्र व जंगमवाडी येथील महापालिकेचे रुग्णालय या पाच ठिकाणी शुक्रवारी (ता.आठ) कोरोना प्रतिबंधात्मक ट्रायल बेस लसीकरण यशस्वी पार पडले.  

जिल्हाधिकारी डॉ. विपीन इटनकर यांनी शुक्रवारी जिल्हा शासकीय रुग्णालय व नांदेड वाघाळा महापालिकेच्या संग्रामजी पोमदे जंगमवाडी दवाखाण्यात भेट देऊन पाहणी केली. या वेळी त्यांच्यासोबत महापालिका आयुक्त डॉ. सुनिल लहाने, जिल्हा शल्यचिकित्सक डॉ. निळकंठ भोसीकर व महापालिकेचे आरोग्य अधिकारी सुरेश सिंह बिसेन यांची उपस्थिती होती. भेटीदरम्यान जिल्हाधिकारी व आयुक्तांनी रुग्णालयास भेट देऊन कोरोना प्रतिबंधक ट्रायल लसीबद्दल माहिती घेऊन त्यानंतर कर्तव्यावर असलेल्या आरोग्य अधिकारी व डॉक्टर, परिचारिका यांच्यासह लस दिलेल्या लाभार्थ्यांशी संवाद साधला.

हेही वाचा- साडे चौदा कोटी प्रकरणी ‘आयडीबीआय’ बॅंकेला तीन दिवसांची मुदत - ओमप्रकाश पोकर्णा ​

१३ हजार चारशेपेक्षा अधिक लाभार्थ्यांची यादी तयार 

पहिल्या टप्यात जिल्ह्यातील शासकीय व खासगी आरोग्य विभागातील डॉक्टर, परिचारिका व इतर कर्मचाऱ्यांना लस देण्यात येणार आहे. जिल्हा आरोग्य विभागाने जवळपास १३ हजार चारशेपेक्षा अधिक लाभार्थी, कर्मचारी यांच्या नावाची यादी तयार करुन ती यापूर्वीच शासनाच्या पोर्टलवर अपलोड केली आहे. त्यामुळे कोरोना प्रतिबंधात्मक लस देताना कुठलाही गोंधळ होणार नाही. याची खबरदारी म्हणून ही ट्रायल बेस घेण्यात आली. 

हेही वाचा- प्रवाशांच्या सोयीकरिता दक्षिण मध्य रेल्वे सरसावली; पुन्हा दोन विशेष गाड्या

आरोग्य विभागाची दक्षता

लसीकरण केंद्रावर समांतर अंतर राखण्यापासून ते लस देण्यात येणाऱ्या लाभार्थ्यांची कशा पद्धतीची काळजी घ्यावी, आय कार्ड तपासणी, हात स्वच्छ धुणे, लसीकरण कक्षात प्रवेश करण्यापूर्वी सॅनिटायझर करणे, लसीकरण झाल्यानंतर त्या व्यक्तीस अर्धा तास तज्ज्ञ डॉक्टरांच्या देखरेखीखाली ठेवणे, एखाद्या लाभार्थ्यास लसीकरणानंतर रिॲक्शन झाल्यास नेमकी काय खबरदारी घ्यावी? अशा अनेक गोष्टींची चाचणी जिल्हा आरोग्य विभागाच्या वतीने देण्यात आली. 

जिल्ह्यातील आरोग्य विभाग सज्ज
फ्रंट लाईनवर कार्य करणाऱ्या लाभार्थ्यांना सर्वप्रथम कोरोनाची लस देण्यात येणार आहे. त्यापूर्वी प्रायोगिक तत्वावर ही चाचणी घेण्यात आली आहे. यापुढे शासनाकडून कधीही लसिकरणाचे आदेश प्राप्त झाले तरी आरोग्य विभाग सर्व तयारीने सज्ज आहे.
- डॉ. विपीन इटनकर, जिल्हाधिकारी नांदेड.