कोण म्हणतं आपण कोरोना संकटाशी दोन हाथ करतोय....? वाचा सविस्तर

नांदेड : शहराची परिस्थिती खरोखर वाईट्ट आहे...काल योगायोगानं इतवारा परिसरांत जाण्याचा योग आला तोही अगदी सकाळी 5.30 च्या सुमारास आणि नंतर 11 च्या सुमारांस... आधी होलसेल मार्केट मध्ये मग रिटेल मार्केट मध्ये... कोरोनाची भिती नाही की संक्रमणाची पर्वा नाही... कसलेही मास्क नाहीत आणि असले तरी ते मिशी झाकण्यासाठी अथवा गळ्यात लटकवण्यासाठी... लोकं नित्यनेमानं अंगाला अंग घासेपर्यंत चिकटून उभे रहातात, भाज्या विकताहेत... घेताहेत. कोण कोरोना? माहित नाही... आणि सोशल डिस्टंसिंगची पर्वाच नाही...

आणि सोशल डिस्टंसिंगची पर्वाच नाही...
मोंढा मार्केट मधून खरेदी करिता तारासिंघ मार्केटकडे गेलो... गुरुद्वारा चौरस्त्याजवळ ट्रॅफिकमध्ये अडकलो 15 ते 20 मिनिटं... गाड्याला गाड्या खेटून उभ्या... कित्येंकांच्या तोंडाला मास्क नाही... गुटखा खाणाऱ्यांना पिचकारीतच समाधान अजूनही मिळत आहेच... खोकणारे खोकलतच आहेत... शिंक मारणाऱ्यांना तर कसलीच फिकर नाही...  कोण कोरोना? माहित नाही... आणि सोशल डिस्टंसिंगची पर्वाच नाही...

कुणालाच कसलीच पर्वा नाही
वजिराबाद मार्केट मध्ये जाण्याचा योग आला त्याबाबद् मित्रांनी सांगीतले की लोकांना पर्वाच नाही.. अगदी फळविक्रेते, भाजीविक्रेते, फुटपाथविक्रेते... असे बसलेत जणू त्यांचा आणि कोरोनाचा कधी संबंधच येणार नाहीय... कुणालाच कसलीच पर्वा नाही... अगदी पाणीपूरीचे गाडे लागलेत.. लोकं पाणी पूरी खाताहेत... ब्रेडपकोडा चे गाडे लागलेत.. पार्सलच्या नांवाखाली कागदात बांधून दिले जात आहे आणि कित्येकजण तिथंच बाजूला उभे राहून पार्सल फस्त करत आहेत... कसले सॅनिटायझेशन? अन कसले सोशल डिस्टंसिंग...  कोण कोरोना? माहित नाही... आणि सोशल डिस्टंसिंगची पर्वाच नाही...

हेही वाचा - माहूर गड : श्री दत्त शिखर संस्थान येथे गुरू पोर्णिमा

सोशल डिस्टंसिंगची पर्वाच नाही...
डॉक्टर्स लाईन असो किंवा कलामंदिर परिसर... लोकं अगदी ओल्या शेंगाच्या गाड्यावरून उचलून शेंगा खाताहेत... गाड्यावरील जांभळं चाखताहेत... चिकू कापून त्याची फाक तोंडात टाकून गोड आहे का नाही तपासत आहेत.. कलामंदीर मागील सोमेश कॉलनी छोटे भाजी मार्केट असो अथवा हिंगोली गेटवरील सकाळचे फुल मार्केट असो... किंवा बाफना कॉर्नरची मेकॅनिकची दुकाने असोत...  मला कोरोना होणारच नाही ह्या अविर्भावात लोकं वावरत आहे...  कोण कोरोना? माहित नाही... आणि सोशल डिस्टंसिंगची पर्वाच नाही...

मांजराच्या गळ्यात घंटा बांधणार कोण
कोरोनाचा प्रकोप आणखी किती दिवस चालणार आहे? माहित नाही, पण या निमित्ताने आपल्या सगळ्यांना नियमांत, शिस्तीत रहाण्याची / जगण्याची जी सवय या निमित्तानं लागणार आहे ती आपल्याच सामाजिक स्वास्थ्याच्या दृष्टीनं अत्यंत महत्वाची आहे. पण मांजराच्या गळ्यात घंटा बांधणार कोण?सोशल डिस्टंसिंग न पाळणाऱ्या लोकांना धडा शिकविणार कोण? कारण जे लोकं सोशल डिस्टंसिंग पाळत नाहित त्यांच्यामुळे सोशल डिस्टंसिंग पाळणाऱ्यांच्या मेहनतीवर पाणी नाही का पडत आहे?

येथे क्लिक करा - कोरोना ब्रेकिंग - आजही पाच पॉझिटिव्ह, दोघांचा मृत्यू

हा मानसिक खेळ चालला आहे
जे लोकं सोशल डिस्टंसिंग पाळत नाहीत ते पाळणाऱ्यांची चेष्टा करत आहेत, कोरोना वगैरे कांही नाही.. हा मानसिक खेळ चालला आहे... हा केवळ 
समाजात भिती पसरवण्याचा प्रयत्न आहे. असा सुध्दा दावा करणारे महाभाग आपला हा मुद्दा इतक्या हिरहिरीनं मांडतात कि मुकाटपणे कोरोनाशी मी 
लढेन ही मानसिकता केलेल्या सामान्य नागरिकाला हे वेगळंच मानसिक द्वंद्व झेलण्याची वेळ येत आहे. आणि मग ह्यामुळे सुध्दा कांही लोकांना मानसिक तणाव निर्माण होत आहे. ह्या व्यतिरिक्त सोशल डिस्टंसिंग अथवा कोरोनाची काळजी घेण्याच्या कितीही सूचना अथवा माहिती राज्य शासनाकडून किंवा केंद्र शासनाकडून अथवा जिल्हा प्रशासनाकडून देण्यात आलेली असली तरी, माझं कोण काय वाकडं करु शकतं? ह्या अविर्भावात वागणाऱ्या ह्या सामाजिक अपराध्यांविरुध्द आता जनतेनंच आवाज उठविण्याची गरज आहे.
शब्दांकन- मनोज पुरोहीत