मुरगूड (कोलहापूर) : येथील महाविद्यालयासमोरूनच भरदिवसा तरुणीला जबरदस्तीने मोटारीत घालून तिचे अपहरण केल्याची घटना घडली. आज दुपारी दोनच्या सुमारास चित्रपटाला शोभेल अशा थरारक पद्धदतीने अपहरणाचे कृत्य घडल्याने शहरात खळबळ उडाली. घटनेची नोंद मुरगूड पोलीसात झाली आहे.
अधिक माहिती अशी, शहरातील एका नामवंत महाविद्यालयात ही मुलगी आज सकाळी गेली होती. महाविद्यालय सुटल्यनंतर ती प्रवेशद्वारा बाहेर आली असता तिच्या पाळतीवर असलेल्या व भरधाव आलेली मोटार (एमएच 02 9109) मधील धीरज ऊर्फ गुंड्या दिलीप सावर्डेकर (मुरगूड) आणि त्याचा मित्र विजय मारुती फराकटे (चिमगाव) यांनी जबरदस्तीने तरुणीला मोटारीतून अपहरण केल्याची फिर्याद तरुणीच्या वडिलांनी पोलिसात दिली आहे.
अपहरण होत असताना तरुणीने ओरडा करत प्रतिकार करण्याचा प्रयत्न केला होता. तिच्या ओरड्यामुळे मुरगूड-कापशी मार्गावरील ही थरारक घटना चित्रपटाला शोभेल अशीच होती. यावेळी काहींनी अपहरण केलेल्या मोटारीचा पाठलाग करण्याचा प्रयत्न केला; पण ते त्यात अपयशी ठरले. ही घटना पोलिसांना समजताच पोलिसांनीदेखील सुमारे पंधरा किलोमीटरपर्यंत पाठलाग करण्याचा प्रयत्न केला; पण अपहरणकर्ते पळून जाण्यात यशस्वी ठरले. अपहरण झालेल्या तरुणीच्या वडिलांनी धीरज ऊर्फ गुंड्या दिलीप सावर्डेकर (मुरगूड ) आणि त्याचा मित्र विजय मारुती फराकटे (चिमगांव) यांच्याविरुद्ध मुरगूड पोलिसांत तक्रार दिली आहे. घटनेनंतर पोलीस ठाण्यासमोर मोठी गर्दी झाली होती. तपास सहाय्यक पोलिस निरीक्षक विद्या जाधव करीत आहेत.
|