व्याजाने दिलेल्या पैशासाठी मारहाण ! राष्ट्रवादीचे नगरसेवक किसन जाधवसह पाच जणांविरुध्द गुन्हा 

सोलापूर : आईच्या कपडे विक्रीच्या व्यवसायासाठी प्रवीण सिद्राम जाधव (रा. सलगरवाडी, न्यू हायस्कूल शाळेजवळ) यांनी किसन जाधवकडून 50 हजार रुपयांची रक्‍कम घेतली. 10 टक्‍के व्याजदराने घेतलेली रक्‍कम परत दे म्हणून पाचजणांनी लोखंडी रॉड, हॉकी स्टीक, बेसबॉल बॅटने मारहाण केल्याची फिर्याद प्रवीण जाधव यांनी सलगर वस्ती पोलिसांत दिली. त्यानुसार तन्मेश गायकवाड, तेजस गायकवाड, प्रेम नागेश गायकवाड, शुभम मरगू गायकवाड यांच्यासह संशयित आरोपींमध्ये राष्ट्रवादीचे विद्यमान नगरसेवक किसन जाधव यांच्याविरुध्द गुन्हा दाखल झाल्याचे पोलिसांकडून सांगण्यात आले.

लॉकडाउनमुळे व्यवसाय बंदच असल्याने व्याजाने घेतलेली रक्‍कम आणि त्याचे व्याज मुदतीत भरण्यास अडचणी निर्माण झाल्या. दरम्यान, प्रवीण जाधव यांच्या मावशी एका खासगी रुग्णालयात उपचारासाठी ऍडमिट होती. मावशीला पाहण्यासाठी त्याठिकाणी गेल्यावर संशयित आरोपी किसन जाधव याची पत्नीही त्या ठिकाणी उपचार घेत होती. दोघांनी एकमेकांना पाहिल्यानंतर किसन जाधव याने व्याज आणि मुद्दल असे एकूण दोन लाख रुपये कधी देणार, असे विचारले. लॉकडाउनमुळे अडचण असून काही दिवसांत देतो, असे प्रवीण जाधव यांनी सांगितले. तरीही चौघांनी हातावर, पायावर, पाठीवर लोखंडी रॉड, हॉकी स्टीकने मारहाण केली, असे फिर्यादीत नमूद करण्यात आले आहे.

संशयित आरोपींना अटक नाही 
प्रवीण जाधव यांनी दिलेल्या फिर्यादीनुसार राष्ट्रवादीचे नगरसेवक किसन जाधव यांच्यासह पाच जणांविरुध्द सलगर वस्ती पोलिस ठाण्यात गुन्हा दाखल झाला आहे. या संशयित आरोपींना पोलिसांनी अद्याप अटक केलेली नाही. या प्रकरणाचा सखोल तपास सुरु असल्याची माहिती सलगर वस्ती पोलिसांकडून सांगण्यात आली. या घटनेत नगरसेवक जाधव यांचा प्रत्यक्षात सहभाग आहे की नाही, याचा तपास पोलिस करीत आहेत.  मारहाण प्रकरणात गुन्हा दाखल झाला होता. मात्र, संशयित आरोपींविरुध्द सावकारीचे कलमही लावण्यात आले आहे.